Omukulunhuwiliki wOmakuti moministeli yOmidingonoko, Omakuti nOmatalelepo, Johnson Ndokosho, okwa pula eenghendabala dopamuhanga dopashiwana kukelelwe omapeya, ta ti omindilo edi itadi dulu okuungaungwa nado kehangano limwe alike.
Eshi kwa li ta popi pefimbo noshoongaleleilonga shopashiwana tashi talulula omilandu dokukelela nokuungaunga nomapeya kOshakati Etivali, Ndokosho okwa ti omapeya otaa twikile nokunyanauna omudingonoko neliko oshilongo ashishe.
Ndokosho okwa popya kutya omapeya ohaa kumu nai oikondo yeliko, mwa kwatelwa omatalelepo nounamapya nounaimuna, omanga yo a nyika oshiponga komaliko neemwenyo dovanhu.
“Otwa kanifa eebiliona 2.5 deehecta detu da pya po komapeya.
Paife, omindilo edi otadi teyaula po neenghono oinyangadalwa ihapu.
Otadi kumu oinyangadalwa yomatalelepo, otadi kumu omaxupilo ngee tashi ya koulifilo woimuna yetu.
Omaliko, eedalate ohadi pi po novanhu ohava kanifa eemwenyo davo omafimbo amwe,” osho a ti ngaho.
Okwa weda po kutya omukalo wa nuka po owa pumbiwa opo kuwilikwe oiningwanima yomapeya nokwaamena eemwenyo nomaliko.
Omukulunhuwiliki okwa ti omindilo dihapu ohadi etwa kovanhu ndee ta londwele kutya omindilo luhapu ihadi kwatwa noukeka, unene ngaa pomafimbo opo hadi tandavele meendelelo ngaashi pefimbo loupyu wamhatutu, pefimbo lomhepo nopeenhele da nyika oikwamahooli.
Okwa londwela kutya okutema omindilo meenghalo da tya ngaho otaku dulu okweeta oshiponga meendelelo, ndee ta pula kuningwe omahongo oshiwana a honge ovanhu nghee ve na okukwata nawa omindilo.
Eshi kwa li ta popi peenghundafana odo tuu edi, ngoloneya waShana Hofni Iipinge okwa popya kombinga yefimano lelongelokumwe lovakufimbinga mokutota po omulandu wa nuka po wokuungaunga nomapeya.
“Omulandu ou otau longo ashike she likolelela komadilaadilo opamuhanga, elitulemo noshinakuwanifa shovakufimbinga aveshe.
Natu longeleni kumwe tu kwashilipaleke kutya omulandu wokukelela nokuungaunga nomapeya owa kwatela mo ovanhu aveshe, otau longo notau kandula po omukundu,” osho a ti ngaho.
Iipinge natango okwa indila omalelo opamufyuululwakalo noshiwana shi nghonopeke omilandu dokulilongekidila omapeya shaashi osha yuka naana pefimbo opo haa holoka unene, ngaashi okukufa po eedalate inadi pumbiwa odo hadi i oilonga yokudima omundilo moshipala nokuninga oitauwa yokukelela omindilo nosho yo okulongekida oilongifo yokudima omindilo manga pepi.
-NAMPA
