‘Ame ohandi ke va uda meulu nokudima po omatimba avo nokuvelula oshilongo shavo’
Omupedu presidente Lucia Witbooi okwa indila Ovanamibia, mwa kwatelwa eendingosho neenhele dokundombola, diha longe ndee tava waimine Efiku lOmailikano Opashiwana tali ka kala ko momafiku 12 Septemba.
Efiku lomailikano, olo tali ka ningwa moitopolwahoololo aishe moshilongo, ola shoneka elunduluko lomaliumbato opo kuungaungwe nomadipayo a nyanyaleka, omahepeko opaukashikekookanhu noiponga yomeendjila moshilongo.
“Efiku lomailikano opashiwana efimbo la fimana lokufuda po, okuya kumwe nokuyambula po oshiwana shetu momailikano.
Mefiku eli, ohatu pula keshe omukwashiwana, eendingosho adishe domalodu neenhele dokundombola di fude po ndee tadi waimine oshilongo ashishe momailikano.
“Opa shangwa, ‘ndele ovanhu vange, ava va lukilwa edina lange, otave lininipike ndele tava indile ndele tava kongo oshipala shange ndele tave lialuluka keendjila davo dii, ame ohandi ka uda meulu nokudima po omatimba avo nokuvelula oshilongo shavo’,” Witbooi ta ti.
Efiku eli okwa li la diminwa kOkabinete.
Okwa ti okwa limbililikwa unene koimbuluma tai hapupala moshilongo, unene ngaa omadipayo, oo a pumbwa eenghono doukwaulu.
“Otwa limbililikwa komwaalu womadipayo a nyanyaleka tau i pombada, oipofa yomahepeko opaukashikekookanhu noiponga yomeendjila moshilongo.
Onghee nee, osha pumbwa elunduluko lomaliumbato opo kuninipikwe nokukufa po oinima ei ya puka panghalafano.
“Otwa itavela kutya eenghendabala detu neenghono eenghwaulu otadi velula oshiwana shetu.
Namibia oku na oshiwana osho sha kala alushe sha itavela meenghono domailikano,” osho a ti ngaho.
Witbooi okwa ti ombelewa yaye oya pula omalelo opamufyuululwakalo novaleli veedoolopa va kwatele komesho omailikano opashiwana moitopolwahoololo aishe moshilongo.
“Ovabisofi aveshe novafitaongalo otava ka kwatela komesho omailikano opo kukwashilipalekwe kutya kapu na ou a patelwa kondje.
Onda eta po efiku eli lomailikano nelineekelo neitavelo linene,” osho a ti ngaho.
Hamushanga wOkabinete nomupopiliko wako Emilia Mkusa Etivali okwa lombwela oThe Namibian kutya efiku eli otali ka dimbulukiwa kwaava va hala.
“Omafiku 12 Septemba aa ningwa efiku lomailikano ashike kashi shii naana oshoondaxa yepangelo.
Efiku eli lomailikano otali ka dimbulukiwa ashike neudo.
Onghee nee, otashi ningwa ashike lumwe ile ngee omumbwe ya holoka vali,” osho a ti ngaho.
Mkusa naye okwa indila Ovanamibia ovo tava mono efimbo opo va kufe ombinga mefiku eli.
“Efiku eli itali dengele kOvanamibia aveshe. Pamalongekido, ohatu longo neengoloneya doitopolwahoololo aishe mokulongekida efiku eli.
Ouyelele uhapu otau ka yandjwa ngee efiku li li popepi,” osho a ti ngaho.
ITAVE SHI POPILE
Oovene veendingosho vamwe ova ti itava popile Efiku lOmailikano Opashiwana, unene ngaa shaashi ova pulwa vaha “patulule”.
Eshi kwa li ta popi noThe Namibian, hamushangandjai wehangano loNamibia Informal Traders and Shebeen Workers Union Matheus Stefanus okwa ti epangelo nali tale kutya Ovanamibia aveshe kave shii ovaitaveli.
Okwa ti kutya efiku lomailikano itashi ti eendingosho nadi pate.
“Efiku lOmailikano Opashiwana itashi ti eendingosho nadi pate she likolelela kefinamhango olo hatu longifa.
Tete ove na okutala kutya opu na ovanhu vehe shii ovaitaveli.
Kombinga yaavo va hala okuya keendingosho? Nava tale nawa etulomoilonga eli.
“Omalodu kae fii oupyakadi notu shi shii nale kutya havanhu aveshe ovo hava i keendingosho ovalunde.
Epangelo natango nali yeleke nee ngee ovanhu aveshe ovo itava ka longa efiku olo itava futwa.
Inashi kala tashi dengele shaashi ovanhu aveshe kave shi Ovakriste,” osho a ti ngaho.
EENGELEKA
Omukulunhuwiliki wehangano ledina Alliance of Christian Churches in Namibia (ACCN) Dolly Nengushe okwa pandula Witbooi eshi a pula oshiwana shi hangane ndele tashi ilikana.
Okwa ti ongeleka oi wete kutya oshinima eshi oshe ya pefimbo nosha fimana, unene ngaa pefimbo eli Namibia a taalela omikundu da kwatela mo oimbuluma, oulingilingi, omalikufo eemwenyo, omadipayo noiponga yomeendjila.
