Ehangano ledina Namibia Revolutionary Transport and Manufacturing ola anya omafaneko taa pula ovashingi veeloli va kale tava yandje ohonde mopate.
Eshi oshe ya nande otali yambidida eudafanotwokumwe lipe pokati koWalvis Bay Corridor Group (WBCG) nehangano lokwoongela ohonde ledina Blood Transfusion Service of Namibia (NamBTS) lokuyambula po eyandjo lohonde moshikondo shoyeendifo.
Ehangano ola ti itali pitike ovashingi veeloli va yandje ohonde manga ve li mopate.
Omapopyo aNaretu aa landula eudafanotwokumwe, olo tali lalakanene okutwa omukumo ovashingi veeloli novashingi aveshe koonono va kale tava yandje ohonde ngee va hala opo va xupife eemwenyo.
“Okuyandja ohonde kashi shii oshinima shokuningwa meendelelo. Opo oshinima eshi shi shive nokukala sha amenwa, napu kale omilandu da yela.
Ovashingi ova pumbwa omakonakono awa opaunamiti, efimbo opo va tye po xwepo nekwashilipaleko kutya otava pewa efimbo la wana lokufuda po manga inava shuna koluuli.
“Itatu danauka neameno lomopate noundjolowele womushingi medina ashike lokuyandja ohonde,” presidente Petersen Kambinda ta ti.
Okwa ti ehangano otali yambidida oshinima eshi shiwa shokuyandja ohonde, ashike okwa weda po kutya ovashingi veeloli itava dulu okuyandja ohonde manga ve li mopate.
Okwa ti kutya okushinga eeloli oilonga idjuu ya pumbwa omunhu a kale a tonata yee oku na oundjolowele kolutu.
Nande kakwa li va kundafanwa navo manga eudafano eli inali ningwa, ehangano ola ti ole lilongekida okukundafana noWBCG noNamBTS opo opolohalama ei yokuyandja ohonde i tulwe nawa moilonga, osho a ti ngaho.
“WBCG noNamBTS nava longe nashe tu longe mo oshinima eshi nawa.
Ohatu dulu okuyambidida tu konge ovayandji vohonde vahapu ndee hatu kwashilipaleke kutya ovayandji voilonga ova yandja omundingono u li xwepo omo ovashingi tava dulu okuyandja ohonde puhe na okuya oilonga yavo neameno moshipala,” Kambinda ta ti.
Omukunhuwiliki woWBCG Edward Shivute Etitatu okwa lombwela oDesert FM kutya ovashingi aveshe vehangano, kutya nee ova dja koshilongo shi lipipo otava dulu okuyandja ohonde shama ashike ve na oinima aishe ya pumbiwa.
Okwa ti ovanhu aveshe ovo va hala okuyandja ohonde otava ka ningilwa omakonakono opaunamiti ngaashi omilandu doNamBTS tadi ti.
“Otapa ka kala omahongo a mana mo tu kwashilipaleke kutya ovanhu ovo twa shoneka va yandje ohonde ove na ouyelele wa wana.
Otwa hala okuxupifa eemwenyo pakuyandja ohonde koNamBTS, shaashi keshe efiku kapu na ohonde ya wana.
“Ohatu indile ovakufimbinga moshikondo shoyeendifo va kufe ombinga mopolohalama omu, oshi na omauwa avali shaashi otashi tu ovayandji omukumo va kale ve na oukolele.
Eshi oshinima shiwa, shaashi eshi ngaa ovanhu tava yandje ohonde va xupife eemwenyo, navo otashi dulika va pumbwe yo ohonde monakwiiwa,” osho a ti ngaho.
Omunambelewa a kula wehangano ledina Transworld Cargo Namibia, Fritz Kaufman okwa ti ehangano otali yambidida oshinima eshi shaashi otashi vatele ovanhu ovo ve li momumbwe.
“Okuyandja ohonde oshinima shiwa osho twa kala nokuyambidida omido dihapu nohatu twikile.
Nashe otu na opolohalama yetu yokuyandja ohonde, omo hatu tu ovanailonga vetu omukumo va yandje ohonde kuvoovene,” osho a ti ngaho.
