Presidente wongudu yoIndependent Patriots for Change (IPC) Panduleni Itula okwa ti eshi a pula presidente Netumbo Nandi-Ndaitwah a hanaune po opaliamente, ta toto po epangelo lopamuhanga nokukufa ko omunashipundi wOmutumba wOpashiwana koshipundi oshinima shi li pafinamhango nosha pumbiwa elelo li pule komesho nawa.
MuFebuluali, Nandi-Ndaitwah okwa li a yandja oushima kutya opaliamente itai pitifa eeveta, ta indile ovatotiveta va xulife po okukonga oitwa yopapolitika ndee tava fimaneke eeveta dopashiwana.
Itula Oshoondaxa okwa ti efinamhango ola yandja oshinakuwanifa kupresidente a kwashilipaleke elelo liwa pakuyambula po, okwaamena nokupopila efinamhango.
Eyeleko laye ola landula oushima okudja keengudu domilameno odo da anya edilaadilo laye lokuhanauna po opaliamente oshivike sha dja ko.
Itula natango okwa anya omapopyo taa ti mongudu yaye omu na omatopauko.
Okwa ti kutya oikundafanwa inai manifwa mopaliamente otai i elelo moshipala ndee kashi shii ashike okuhaudafana kwopapolitika.
Omapopyo aye ee ya konima epangelo etihetatu la wanifa eemwedi o16 inali pitifa nande oveta imwe, kakele ashike komutengenekwafaneko noveta youndjolowele wopamadilaadilo. Eenotwaveta da fimana depangelo natango odi li mopaliamente inadi manifwa.
“Opaliamente oi lile po okuninga eeveta, okutalulula elelo nokukalela po ovanhu,” Itula ta ti.
Okwa londwela kutya omakateko okupitifa eeveta otaa i epangelo moshipala, taa undulile komesho omalunduluko nokungwangwaneka ovanangeshefa vokondje yoshilongo nosho yo okuteya po elineekelo loshiwana momahangano oudemokoli.
Itula okwa ti opolitika yaNamibia oya lunduluka paife nokapu na vali ongudu imwe oyo ashike tai pangele nokuninga omatokolo.
Okwa ti eengudu domilameno odi na oshinakuwanifa shopafinamhango shokukwashilipaleka kutya opaliamente oya wanifa po oilonga yayo, ta indile eengudu adishe dopolitika di longele kumwe di manife eeveta odo inadi manifwa manga oshikako shopalimante yopaife inashi pwa ko.
Abed Hishoono oo e li oshilyo shongudu okwa yambidida Itula, ta ti: “Ohandi yambidida presidente wange.”
