Oshilyo shongudu yoIndependent Patriots for Change (IPC) osho shi lile po Oministeli yOilonga nOyeendifo Nelson Kalangula okwa pula epangelo li endelelife onotwaveta yokututa ovatwaalelwa.
Kalangula okwa ti otai dulu okukandula po omikundu dimwe odo da taalelwa kovashingi veetekisa noyeendifo ikwao yokututa ovatwaalelwa.
Eindilo laye ole ya eshi Ombelewa yOmatokolo opaveta nopolifi ya shiivifa oshivike eshi kutya ovo va monika ondjo yokutauluka eeveta domeepate ova wedelwa ko eemwedi mbali defilonghenda va fute outekete vavo, okudja momafiku 03 Auguste fiyo o30 Septemba. Efilonghenda eli ola yandja omhito kovashingi vomatuwa va fute eengunga davo doutekete vomopate.
“Endelelifeni onotwaveta yokututa ovatwaalelwa, shaashi otai kandula po omikundu edi dihapu, natango, otai ka xupifa eemwenyo konima yefimbo,” osho a ti ngaho.
Kalangula okwa ti efilonghenda otali vatele ovashingi omayovi ovo va kala ve na oumbada wokutulwa moipandeko, wokukufwa oihauto yavo nokukanifa oiyemo.
Ashike nande ongaho, okwa ti efimbo lefilonghenda kali na sha nomatomeno oo haa eta ovashingi veetekisa va kale nokumona omahandukilo mopate.
Kalangula okwa ti ovashingi veetekisa otava mono oixuna kondado yomahooli, eefuto domikanda damuni nokupangelifa oihauto yavo manga tava mono oiyemo ishona neenghono.
Molwoinima ei, vahapu itava dulu vali okufuta omahandukilo avo omeepate, oo luhapu haa eta va mangwe po.
Okwa yandja yo vali ombedi komumbwe yeenhele dokulondekela nokuhelulila.
“Luhapu ovashingi otava fininikwa va hoolole pokati kokukanifa omutwaalelwa ile okukanghama shihe li paveta shaashi kapu na eenhele dokulondekela nokuhelulila da wana,” osho a ti ngaho.
Kalangula okwa ti ovashingi vahapu natango otaa mono oixuna yokukoleka kutya ove na outekete vangapi va kwisha nosho yo okutalela po omhangu pefimbo loilonga, nande opu na omukalo wokufuta outekete pamalungula upe.
Okwa indila epangelo li ete po omikalo dokufuta di li xwepo ndee tali kufa ko komahandukilo pefimbo eli lefilonghenda opo li vatele ovashingi ovo ve na oiyemo i li pedu neenghono va wapaleke eengunga davo.
Kalangula natango okwa indila omalelo eedoolopa nOministeli yOilonga nOyeendifo va endelelife oilonga yeenhele dokulondekela nokuhelulila meepate da kula.
Okwa ti ovashingi inava pewa omahandukilo ngee inava tulilwa po eenhele edi da wana.
Natango okwa indila oshikondo shokuninga omatokolo noshikondo shokutula po elandulafano mopate i kale tai yandje omayakulo peenhele dokulondekela nokuhelulila nokuwedela eevili doilonga momaxuliloshivike opo ovashingi va dule okukoleka nokufuta outekete vavo pehe na okufaula koilonga.
Kalangula okwa pula ovashingi va longife okafimbo aka kefilonghenda va fute outekete vavo.
