Eengudu da yooloka domilameno oda pula omhangu yomahoololo opo i popile ku ningwe omahoololo amwe nokukupulweshi oidjemo yomahoololo omutumba wopashiwana omudo 2024.
Koshoongalele shoikundaneki mOvenduka Etivali, eengudu dopolitika oda holola eyambidido lado mekondjifo lomahoololo olo la etwa kongudu yoIndependent Patriots for Change (IPC) noLandless People’s Movement (LPM).
Henk Mudge, pelesidente wongudu yoRepublican Party, okwa ti omahoololo kakwa li taa dulu okulineekelwa nakeshe oshidjemo shiheshi okuninga omahoololo amwe otashi ka kala shi na omawii ahapu koudemokoli woshilongo monakwiiwa.
“Omahoololo okwa li a danenwa nai shi li koluheela. Itatu dulu okupitika omhangu i popile oshinima eshi ile i popile oinima oyo tai tu imbi okuninga omahoololo amwe. Ngee osho osha ningwa, nena otwa kana,” Mudge osho a ti ngaho.
Okwa londoda vali kutya ngee oveta yaNamibiaoya kala inai manguluka yoo kai li pauyuki otashi dulu okuteya ovanangeshefa vokondje yoshilongo omukumo.
“Ovanangeshefa vakula alushe ohava tale kemaunguluko loveta yoshilongo omaknga inava longifa omaliko avo. Ngee eemhangu detu oda talika kutya kandi li kudoovene, itave ya va longife oshimaliwa shavo moNamibia,” Osho a ti ngaho.
Hamushangandjai wongudu yoPopular Democratic Movement Manuel Ngaringombe okwa ti ekondjifo lomahoololo ola kuma ongudu meyukililo.
“Oidjemo yoshibofa eshi oye tu kuma meyukililo sho osho nee twa fikama moukumwe noIPC oLPM,” Osho a ti ngaho.
Omuleli wongudu yoNamibia Economic Freedom Fighters (NEFF) Epafras Mukwiilongo okwa ti ongudu yaye otai yambidida oshibofa shaashi oshayela nawa kutya omahoololo okwa li a danenwa.

“Ngee omhangu oya mono kutya omahoololo okwa danenwa, oshinima shiwa okuninga omahoololo amwe, shaashi oinima imwe otai ka teya ashike ekotamhango,” Mukwiilongo.
Okwa oNEFF ongudu oyo tai popile alushe ekotamhango laNamibia kwaavo va hala oku li teya.
Mike Kavekotora, omuleli wongudud yoRally for Democracy and Progress, okwa ti eyokumwe leengudu domilameno okwa li la kufwa nomhepo youdemokoli.
“Etokolo letu lokuyambididafana okwa li la ningwa eshitwa mona kutya omahoololo aa okwa vakwa, eshi twa mona kutya omahalo Ovanamibia inaa wanifwa po, eshi twa mona kutya momilandu domahoololo aNamibia omwa li omaxwaxwameko mwa kwatelwa naao okondje yoshilongo.”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!