Ovaleli veengudu domilameno otava nyenyete oshinima osho tava ti “oilonga yookaume” okudja kwaavo ve na ekwatafano neengudu donhumba dopolitika.
Ova ti oshinima eshi inashi fimaneka ouyuki neyandjo loilonga tali tale komauhongelwe.
Hamushangandjai wongudu yoPopular Democratic Movement (PDM), Manuel Ngaringombe okwa ti omalimbililo otaa ningi ahapu kombinga yeyandjo loilonga tali xwaxwamekwa koukwamuhoko nopolitika.
“Onda hala okuweda po kutya opu na yoo omalimbililo oilonga yookaume,” osho a weda po ngaho.
Eshi oshe ya konima minista woilonga noyeendifo Veikko Nekundi a ti kutya okwa manifa omakonakono kombinga yokukuta kwa fa kwa nyika oukwamuhoko koRoad Authority (RA), oko vati ovanambelewa vakula ve li vahamano aveshe va dja koZambezi.
Nekundi okwa ti okwa li a pewa ouyelele wa puka kovanailonga.
Omakonakono koRoad Authority aa xwaxwameka oshikumungu shokuyandja oilonga momahangano nomeembelewa depangelo, oshinima osho omunawino moipambele yoilonga Herbert Jauch a ti kutya osha kala mo efimbo lile moshilongo.
Ngaringombe okwa ti oshikumungu osha dja nale, eshi ashike oshilongo sha manguluka, “ngee ove oshilyo shongudu tai pangele, Swapo, oto mono oilonga u udule vakweni shaashi ashike ou na oukwashilyo woSwapo”.
“Fimbo limwe oto mono oilonga nande opu na omunhu e na ouhongelwe u dule woye medina ashike lopolitika,” osho a weda po ngaho.
Omunapolitika woSwapo Uahekua Herunga, okwa ti ngeno okwa li ovanhu aveshe tava longo mepangelo nomomalelo omahangano epangelo oilyo yoSwapo, ngeno otai tavele kutya Ovanamibia otava mono oilonga medina loSwapo.
“Ngee eepelesenda dovanhu aveshe moshilongo ovo vehe na oilonga ove li keengudu domilameno, ohandi itavela oshinima osho kutya ‘oilyo ashike yoSwapo’ tai mono oilonga moshilongo,” osho a ti ngaho.
“Ngee hasho ngaho, nena enyamukulo ou li na.”
