Omunangeshefa Leake Hangala okwa ti Okabinete oke na eeminista dovanyasha doo oda longwa, ashike luhapu ohadi dimbulukifa ovanashipundi veenguduwiliki ile ovaleli vomahangano epangelo kutya odo ovahona vavo.
Hangala, oo e li omunashipundi wonguduwiliki yoshiputudilo shoNamibia University of Science and Technology, edi okwe di popya komesho yapresidente Netumbo Nandi-Ndaitwah pokamulongo novakulunhuwiliki vomahangano epangelo Etine.
“Ngee omunashipundi a i oko, oshinima shotete minista te ku lombwele osheshi: dimbuluka, aame minista woye. Ame ominista yOkabinete. Inandi pumbwa okulombwelwa ngaho,” osho a ti ngaho.
Hangala okwa ti Namibia oku na eeminista dovanyasha doo oda nuka po.
Okwa tambula ko oilonga yeeminista momahangano epangelo ashike ota pula aveshe va yambule po omahangano epangelo.
Eshi a pulwa a yeleke nawa koThe Namibian Etine, Hangala okwa fatulula kutya omafimbo amwe omaukwatya ohee lidenge moinima ashike otashi dulu okukakeka eenghundafana, ta weda po kutya pefimbo laye momido do1990, omaukwatya okwa li a yooloka ashike oinima okwa li tai longo.
Hangala okwa ti nakukufwe omukalo wetalululo wa nuka po u tale omikundu odo da taalelwa komahangano epangelo opo kutalike kutya oshike shi na okuningwa po kukelelwe omikundu edi.
Okwa ti omutumba womahangano epangelo nao ou na eenghono dokulundulula osho itashi longo vali ndee oinima tai endele pamwe nefimbo.
“Kapu na oshinima sha nyika oshiponga shi dulife ndokotola wopaunamiti ta yandje omiti da puka ndee oshinima osho shi li ngaho nomoshiwana nomeliko. Atusheni otu shi shii kutya omahangano epangelo aa taalela omikundu da yooloka,” osho a ti ngaho.
Okwa ti nakukonakonwe ngee omahangano epangelo aeshe a totelwe konima yomido o36 natango aa pumbiwa ngaa nongee osha pumbiwa ngaa a kale ngaashi e li nena.
Omukundu wopashimaliwa nao otau imbi omahangano epangelo a ye komesho nawa nokuyandja omayakulo ngaashi e na okuninga.
“Ngee opu na oshinima shimwe osho twa kala hatu longo nodjuu nasho, neyokomesho ile edopo lehangano ole likolelela musho, ewiliko lehangano,” osho a ti ngaho.
Eshi a nyamukula Hangala, Nandi-Ndaitwah okwa ti: “Pamukalo ou we shi popya, osha fimana okuninga omalunduluko shaashi oshikumungu oshopaumwene omo hatu ti otu na eeminista dovanyasha tadi lombwele ovanhu kutya aame minista woye.
“Eeminista odo dovanyasha opo tadi kala. Lipula ashike to tula omahangano epangelo aeshe koshi yeeminista dovanyasha edi. Oshike tashi ka ningwa po?” presidente ta pula.
Okwa ti omalunduluko okatando konotwaveta yomahangano epangelo otee likundwa mOmutumba wOpashiwana paife ngaha opo omikundu adishe edi di ungaungwe nado shaashi okatendo konale kake na eshi ka eta po.
Minista mukulu woshimaliwa Carl-Hermann Schlettwein okwa ti ngee eeminista otadi pitilile oilonga yeenguduwiliki domahangano epangelo, nena kapu na omumbwe yokukala pu na eenguduwiliki.
“Ngee osho shi li ngaho, mboli ino pumbwa onguduwiliki. Otashi kala shihe li paveta nandenande,” osho a ti ngaho.
Schlettwein okwa lombwela oThe Namibian Etine kutya oveta otai ti eenguduwiliki, ndee haa eminista, odo di na oshinakuwanifa shokuwilika ovakulunhuwiliki.
“Ohava lopota keenguduwiliki davo ndoo tadi lopota keeminista. Inashi pumbiwa eeminista di ye da yukilila kovakulunhuwiliki. Kashi mo moveta ei ndi shi,” osho a ti ngaho.
