OMUNASHIPUNDI gwehangano lyomatalelopo lya Namibia [NWR] Jackie Asheeke okwa ti Napwu ota kambadhala okwiidhopa mehogololo lyomukuluntuwiliki gwehangano ndika.
Asheeke okwa popi ndhika sho a yamukula ombilive ndjoka Napwu ashanga ta thaneke kutya omukuluntu wiliki gwa NWR a hogololwe okuza mookandidate dhomeni lyehangano ndele ha ku za pondje yehangano. Mombapila ndjoka ya nyolwa kwaamushanga gwopevi gwa Napwu, Gabes Andumba, ehangano lyaniilonga yomepangelo ota li thaneke kutya omuleli gwa NWR na ulikwe okuza meni, lyo ishewe eipyakidhilo lyokukonga omunambelewa ngoka omunene ngashingeyi olya pumbwa oku mwenekwa. Asheeke okwa ti ombapila ndjika ota yi longithwa okutilitha noshowo okweendameka uushili. Okwa ekelehi woo omapopyo ngoka taga ti ye na ye okwa li a ningi eindilo opo a pewe andola iilonga mbika. Okwa ti ye keshi nando ogumwe gwaamboka ya ningi eindilo. Andumba aniwa okwa popi uukilila Asheeke paumwene a ti uukwashilyo we mewilikongundu lya Millenium Challenge Account noshwo uukuluntu we mehangano lyomatalelopo owo oshinima tashi ipumu mumwe niilonga ye ongo omunashipundi sha NWR. Andumba okwa ti Napwu oku na einekelo mongunduwiliki ya NWR, na oyi itaala kutya otashi kala oshiwanawa ngele omuniilonga gumwe meni lyehangano oye ta pewa opoosa ndjoka, pamulandu gwomanifesto yoSwapo. Asheeke okwa ti ombapila oyina elalakano okutilitha noshowo okwiidhopa mehogololo lyomukuluntuwiliki gwa NWR. Okwa ti ontumwafo ndjoka ota yi vulu oku talwa ongo onkambadhala yomuntu gumwe oku keelela iilonga yehogololo lyomukluntu wiliki. Asheeke okwa ulike kutya aantu mboka ya yoololwa mo opo ya pula pulwe oya yoololwa nopwaana ekalepo lye. Okwa ti oshiwike shika ookandidate ndatu ndhoka dha hogololwamo otadhi ka pula pulwa, nopethimbo ndika opo ashike omunashipundi gwewilikongundu, Asheeke ta ka kala woo ena mo oshitopolwa. Okwa ulike kutya aaniilonga yatatu yomeni lyehangano mboka ya li ya ningi omaindilo giilonga mbika oya li ya kuthwamo oshoka kayena iipumbiwa ayihe nenge yagwana oku pewa iilonga mbyoka. Ombapila ya Napwu oya li ya tuminwa omukuluntu gwokulipo gwa NWR, Olavi Hamwele, ta yi mwiindile opo a mweneke oshinima shoku hogolola omukuluntu wiliki uule wethimbo lyaashiwike.Mombapila ooyo tuu ndjoka Andumba aniwa okwa lundile Fenata kutya okulilepo uuwanawa waantu mboka ya li ya hala opo NWR a tekepo. Omanga Asheeke okwa ti ombapila ya Napwu oyo onkambadhala yomuntu gwontumba ngoka ta longitha Napwu opo a popye pehala lye
