Omuprima minista Elijah Ngurare okwa ulika omunyanyangidi mukulu woThe Namibian Tangeni Amupadhi a ninge umwe womilyo i li 11 yokangudu kowina kokutalulula eendjabi domahangano epangelo.
Amupadhi, oo a fiya po oThe Namibian muJanuali, konima a kala nokukwatela komesho oshifokundaneki oule womido 15, oumwe womwaavo va hoololwa va konakone eendjabi momahangano epangelo nokupopila eendjabi dipe dovawiliki noilyo yeekomitiye.
Okangudu kowina otaka ka wilikwa komukulunhuwiliki mukulu wehangano loNamibian Institute of Public Admistration and Management (Nipam) Joseph Diescho, naminista mukulu wehongo Itah Kandjii-Murangi oye omupedu nashipundi.
Oilyo imwe yokangudu aka oya kwatela mo omufita waElcin Mateus Tshapa Tshakapolo, omukulunhuwiliki mukulu woRoad Authority Conrad Lutombi, omukulunhuwiliki woLuderitz Waterfront Fluksman Samuehl, ngoloneya mukulu wo||Kharas Aleta Frederic, omupopiliko wapresidente mukulu Mathew ||Gowaseb, oshilyo shOkomisi yOmayakulo Oshiwana Habatte Doeses, Aino Mukwiilongo nahaende Tanja Jacobie.
She likolelela kouyelele wa yandjwa kOmbelewa yOprima Minista Etitano, okangudu aka kowina oka ulikwa ka longe okudja mulotete laJuli fiyo omomafiku 30 Septemba 2026.
“Okangudu kowina oka ulikwa ka tameke omatalululo oipambele yeendjabi dovanailonga vomahangano a fimana epangelo.
Oinakuwanifa yako oya kwatela mo okutalulula eendjabi momahangano aeshe epangelo nokuyandja omapopilo kombinga yeendjabi doilyo yeenguduwiliki neekomitiye,” omukanda tau ti.
Ongudu ei oya pewa eenghono dokutalulula omilandu dokukuta tadi wilike ovakulunhuwiliki momahangano epangelo, taka ningi omafaneko omilandu domondjila, taka eta po omilandu dokukuta ovanailonga vepangelo odo tadi kala nokulongifwa kongudu yokuyandja oilonga nokuyandja omayele okuhoolola oilyo yeenguduwiliki momahangano epangelo.
Okomitiye oya teelelwa i yandje olopota yaxuuninwa kokomitiye yOkabinete i na sha nomayakulo oshiwana pexulilo loshinakuwanifa shayo sheemwedi nhatu.
