OOSHALI dhiikulya,iimaliwa noonguyo odha tameke ta dhi pewa yina yaanona yane, ngoka keena iilonga na ota lumbu wo nombuto yo HIV, ngoka eli ta mono iihuna.
Omakwatho ngaka oge ya konima yiiwike iyali sho The Namibian ali a lopota kombinga yonkalo moka Sara Kaffer (38) ngoka eli yina yaanona yane mboka hazi nayo megumbo lye lyoshipeleki polukanda lwa Kosis moshitopolwa //Karas elimo. Okwa kala ha hupu onga omuniilonga mofaalama yontumba ashike okwe keetha iilonga ye mo 2013, opo a sile oshimpwiyu omwanamati Desmond Kaffer gwomivo 19, ngoka ena uuvu wesipa lyombunda, konima sho yinakulu ngoka a li ha kala naye a li eehama eta mana oondjenda.
Kaffer okwa popi kutya ye noyana oha ya hupu owala moshimaliwa shoka hashi zi kepangelo.
The Namibian okwa li a yakula omatumwalaka gopaungomba okuza kaantu ya yooloka mboka ya kala ya hala oku kwatathana na Kaffer opo ya gandje omakwatho gawo.Omukiintu gumwe mo Keetmanshoop, ngoka ina hala oku tumbulwa kedhina okwa ti kutya ehokololo lya Kaffer olya gumu omutima gwe na okwa gandja N$ 200,iikulya,ekumbatha oshowo etalashe.
“ Onda lesha, etandi lesha, etandi lesha ishewe ehokololo ndoka. Ombepo ya Kalunga oya kwathandje opo ndi kwathele, “ omusamaria nguka omunamutimahenda osho apopi ngaaka noku gwedhapo kutya oluvalo kalushi olupu oku putudha naantu oyena okwiilonga oku kwatha mboka yeli mompumbwe.
“Oya li ya nyanyukwa noonkondo sho ndali ndeyape ekwatho ndoka. Ondali ndina oku ya kwathela sho nda lesha ehokololo ndoka moshifo. Ondiinekela oka kwatho hoka nda gandja ota ka ka lundululasha moonkalamwenyo dhawo,” tati ngaaka.Kaffer mEtiyali okwa li uulike olupandu lwe komukiintu ngoka eyakwathela.” Kalunga ote mu yambeke olundjilundji.”
Omukiintu nguka eli mompumbwe okwa popi kutya omukalimo gumwe mo Keetmanshoop okweyape wo N$ 100, omanga omukwawo eli ko Windhoek eyuuvanekele teya landele o TV. Kaffer okwa popi kutya okwa landa onyama niikulya yilwe niimaliwa mbyoka apewa kaanamutimahenda mboka.
