Omupedu presidente Lucia Witbooi Omaandaxa okwa lekela oilyo yeumbo etivali lopashiwana oyo oshikako shayo shomido nhano sha yuka pexulilo.
Oshikako shavo otashi pu ko momafiku 26 Novemba, sha landula omahoololo omalelo oitopolwahoololo needolopa.
Eshi kwa li ta popi poshivile eshi, omupedu presidente Witbooi okwa ti oshivilo itashi ulike ashike euyopexulilo loshikako shavo mopaliamente ashike otashi ulike yoo euyopexulilo lomayakulo oshiwana oule womido nhano, ekwatelo komesho lekotamhango neyambulepo loudemokoli.
“Eshi hatu xulifa oshikako oshitihamano sheumbo etivali lopashiwana, ohatu fuda po mangha tu lipule elitulemo letu moshiwana shaNamibia,” osho a ti ngaho.
Eumbo etivali lopashiwa, Witbooi okwa ti, natango oli li onhele yokukwatela komesho oudemokoli, tai kwashilipaleke kutya oshiwana shaNamibia keshe moshitopolwahoololo osha tya sha momilandu dopashiwana.
Okwa ti oshikako shewiliko oshe ya pexulilo nelunduluko nomikundu, dopashiwa nopaunyuni, ta weda po kutya okupitila mokupula komesho, oukumwe newiliko liwa, ewiliko ola ulika elitulemo la mana mo keenghono dekotamhango ongeumbo lomatalululo, lokukalela po oitopolwahoololo nokuninga eeveta.
Okwa weda po kutya ewiliko ola talulula eenotwaveta di li 65, kombinga yoshimaliwa shoshiwana, ouyuki, okukonga oipumbiwa, oishoshela noundjolowele, tali kwashilipaleke kutya keshe oveta tai pitifwa kopaliamente oya kalela po Ovanamibia aveshe.
