OMUKONDJELIMANGULUKO a tseyika nawa tatekulu Simeon Linekela (Kambo) Shixungileni, a kala momukunda King Kauluma mOndonga moshitopolwa shaShikoto, okwa mana oondjenda dhe moshipangelo shepangelo shaShakati omutenya gwEtiyali lyoshiwike shika konima yuuwehame nomepipi lyomimvo omilongo hetatu (80).
Eso lyatatekulu Shixungileni olya kolekwa kugavena yaShana Clemens Kashuupulwa nosho wo kugavena yaShikoto Penda yaNdakolo, mboka ya ti Namibia a kanitha natango limwe lyomomapendafule ge omanene noga simana. Eso lyatatekulu Shixungileni olya landula eso lyependafule tatekulu Lameck Iithete nosho wo lyependafule tatekulu Simon Mzee Kaukungwa.
Nakusa tatekulu Shixungileni okwa valelwa mOkadiva mOukwnayama meti 2 Febuluali 1934 nomomumvo 1959 okwa yi mOwambo People Organisation (OPO) nosho wo nee sho ya ningi Swapo momumvo 1960.
Okuza mpoka nakusa tatekulu Shixungileni okwa thigi po oshilongo nokuya kombanda ya ka kondjele emanguluko lyaNamibia, momumvo 1961 okwa tumwa komadhewo gopakwiita koSoviet Union (USSR) nomomumvo 1962 okwa galukile koTanzania. Momumvo 1965, yo nayakwawo yaakwiita yatano, oya tumwa ye koNamibia ye ye tameke iita yokakulumbwati yekondjelomanguluko.
Oya li nee mewiliko lyakomanda gwawo Otto Nankudhu. Shixungileni oye a li omupehakomanda gwawo. Sho ya thiki moshilongo, oya tameke okukuta nokudheula aakwiita yoSwapo, moka mwa kwatelwa oonakusa Eliaser Tuhadeleni (Kahumba kaNdola), tatekulu nakusa Lameck Iithete, tatekulu Isaack Shoombe nooyakwawo oyendji. Oya toto po nee okamba yawo yaakwiita mOmuguklugwombashe moka ya ponokelwa ketanga lyomukolonyeki South Africa meti 26 Auguste 1966.
Nakusa tatekulu Shixungileni okwa kwatelwa molugodhi ndoka, nokwa falwa koPretoria shaSouth Afrika, hoka a ka pangulwa nokwa monika ondjo moveta yuukulo.
Ta tumwa kondholongo yaRobeen Island hoka a kala sigo omomumvo 1985, sho e ethwa. Okwa galukile kegumbo koNamibia nokwa kala mOvenduka.
Okuza kOvenduka okwe ya a ninge egumbo lye moKing Kauluma mOndonga moshitopolwa shaShikoto moka a kala sigo omeso lye. Okwa thiga ko nee omukulukadhi gwe mee Theopolina, oyana yahamano naatekulu. Oshifo shetu otashi gandja omahekeleko koonakuthigwapo atuheni.
