Shikwaya okwa li mekutu

Petrus Shikwaya (21), umwe womwaavo tava tamanekelwa oshipofa sha kwatakanifwa neponokelo lomutamaneki Justine Shiwedha kOndangwa, okwa lombwela omhangu kOndangwa kutya okwa longifwa kuxekulu ehe na eshiivo.

Eshi kwa li ta yandje oumbangi pefimbo loihokolola yaye yobooloha, Shikwaya okwa ti kakwa li e shi Shiwedha yee kakwa li e mu uda nale.
“Inandi mu mona noku mu uda nale.

Kanda li ndi na eshiivifo kombinga yoshiningwanima. Nefiku loshiningwanima sha ningwa kanda li po. Okwa li ndi li mOvenduka,” osho a lombwela omhangu ngaho.

Shikwaya okwa ti xekulu, Abner Mateus, omunambelewa wopolifi mukulu, okwa longifa ombaanga yaye momakengelelo ashike yee kali nande e shi shii.

She likolelela kuShikwaya, Mateus okwa li ha tula oshimaliwa shi fike poN$2 000 kombangaa yaye keshe omwedi.

Oimaliwa ei okwa li nee hai futwa Sanlam Namibia komwedi.

Okwa ti oshikando shimwe mombaanga yaye okwa li mwe ya oshimaliwa tashi ulike sha dja koSanlam, ashike kakwa li nande e shii kutya osha shike.

“Kakwa li ndi shii kutya oshimaliwa otashi di peni. Konima onda ka uda taku ti vati ondi li meembete mOnandjokwe nonda pula oshimaliwa koSanlam, osho ndihe na eshiivo lasho,” Shikwaya ta ti.

“Kakwa li ndi shii nge oshi na sha nokupula oimaliwa ya sha,” osho a ti ngaho.

Shikwaya okwa ti Mateus oku na ekwatafano liwa naye nokwa dana onghandangala ya fimana monghalamwenyo yaye.
“Okwa li a fa tate.

Oshikando shimwe okwa pele nge oSuzuki itilyana, oyo nda ka landifa po momudo 2023. Okwa lombwela nge kutya okwa li e na ongeshefa koKatima Mulilo.

Konima nda uda oshipofa shoSanlam, onda itavela kutya mutu okwa li ta ningi oinima inai yuka,” osho a lombwela omhangu ngaho.

Shikwaya natango okwa popya kutya okwa tumina omunhu ehe mu shii oshimaliwa, vati a pulwa e shi ninge kuxekulu.

Oimaliwa oyo, okwa ti, okwa li ya ka landifwa oudiyo oo kwa li wa longifwa meponokelo laShiweda.

“Onda tuma oimaliwa ngaashi nda lombwelwa kutatekulu nokakwa li handi dulu okupula edina lomunhu oo handi i tumine naasho tai ka longifwa.

Kai shi yange,” osho a ti ngaho.

Omhangu oya uda yoo osho sha eta ekwatepo laShikwaya momafiku 16 Novemba 2025.

Okwa popya kutya okwa twalele xekulu modoolopa okudja koloodja mOvenduka, konima kwa li e mu dengela.

“Onde mu twala kodoolopa konima a dengela nge.

Okwa li e li novanhu vavali, omulumenhu nomukainhu,” osho a ti ngaho.

Pefimbo opo, Shikwaya okwa ti okwa li ha shingi Yango yee kakwa li nande e shii ovanhu ovo va li naxekulu.

Ashike nee, okwa ka tameka okufeekela konima a mona okandjafa kopolifi ke li motuwa yaye.

“Ovanhu kakwa li ndi va shii, ashike konima onda ka mona kutya omulumenhu omunambelewa wopolifi shaashi okwa fiya okandjafa kaye kopolifi motuwa yange,” osho a ti ngaho.

Okwa weda po kutya xekulu okwe mu futa oshimaliwa shi fike poN$200 eshi e va twala ndee te mu lombwele kutya okwa pewa obooloha, shaashi okwa li modolongo.

Shikwaya natango okwa lombwela omhangu kutya okwa kala ha longele xekulu, ta longo ovanhu okushinga mOvenduka, nokwa li ha futwa eepelesenda o-30 doshimaliwa osho a longa komwedi.

Okwa popya vali kutya nande oshipofa shedipayo shaye osha ekelwashi, natango oku li modolongo molwoipofa youlingilingi.

Osho ta ti osha ya moshipala oinima ihapu monghalamwenyo yaye.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.