Shikwaya okwa kengelela xekulu otuwa oyo ya ka longifwa oimbuluma kOndangwa – epangelo

Epangelo ola ti kutya omutamanekwa moshipofa shedipayo, Petrus Shikwaya, okwa kengelela yexulu otuwa ndee konima tai ka longifwa moshiningwanima sha kwatakanifwa neponokelo lomutamaneki, Justine Shiweda kOndangwa.

Shiweda okwa li a ponokelwa noudiyo wa nyika oshiponga ndee ta yashwa oikando iheyali momafiku 17 Oktoba 2025 kOndangwa.

Omutamaneki Yeukai Kangira, okwa lombwela omhangu yamangestrata kOndangwa onghela kutya Shikwaya okwa kengelela xekulu, Abner Samuel, otuwa yoSuzuki oyo kwa li ya landwa ngeno i ye mongeshefa yaYango mOvenduka.

She likolelela kepangelo, otuwa okwa li nee ya pewa omutamanekwa pamwe naShikwaya, Petrus Uusiku, ongolupandu eshi vati a landa oudiyo oo wa longifwa meponokelo linyanyaleka la ningilwa Shiweda.

Oudiyo vati okwa li wa landwa momafiku 29 Septemba 2025, koshimaliwa shi fike poN$1 200 konhele inai tumbulwa mOvenduka.

Omhangu oya uda kutya otuwa okwa li ya twalwa konooli, oko kwa li vati tai ka longifwa monghendabala yotete yokukufa Shiwada omwenyo petameko laOktoba 2025.

Onghendaba vati oya dopa. Notuwa vati oya ka kondama moshitopolwahoololo shaShikoto pefimbo Uusiku kwa li ta alukile kOvenduka.

“Owa kengelela xokulu otuwa, oyo ya ka mona oshiponga konooli,” Kangira osho a lombwela omhangu ngaho.

“Otuwa okwa li ya landelwa Petrus Uusiku omaano, eshi a landa oudiyo oo wa tilwa Justine Shiweda.

Xokulu okwa li a kumwa,” osho a ti ngaho.

Ashike nee, Shikwaya okwe likanyuna omapopyo aa, ta twikile nokutya xekulu okwa li a landelwa otuwa ya longa nale, Abner Samuel, koshimaliwa shi fike poN$40 000.

Shikwaya okwa yandja oumbangi kutya etokolo lokutuma otuwa konooli okwa li la ningwa kooxekulu, Samuel naAbner Mateus.

Okwa popya vali kutya okwa yandja otuwa kuUusiku a ye konooli ngaashi a lombwelwa.

Epangelo, nande ongaho, ola ti Samuel okwa yandja ehokololo kopolifi ta ti kakwa li nande e na eshiivo kombinga yotuwa ya pewa Uusiku ndee tai kufwa mo mOvenduka, ta ti kutya “okwa kumwa” konima a uda osho sha ningwa po.

Oshikumungu eshi osha undulilwa komafiku 09 June opo oihokolola yobooloha i twikile.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.