Ndokotola wopaunamiti kOnandjokwe Dennis Noa (31), okwa mangwa po mexuliloshivike eshi ta popilwa ekwatongonga lomulumenhu (26) konduda yaye moshipangelo shaNandjokwe.
Otaku tiwa Noa okwa li nale ta popilwa ekwatongonga lomunaudu omulumenhu (18) moshipangelo shaKatutura konima yomido nhatu, ashike konima Omhangu yOpombada yaVenduka kakwa li ye mu mona ondjo.
Omupopiliko wopolifi wopashiwana omupedu komisina Kauna Shikwambi okwa koleka kutya Noa okwa mangwa po Olomakaya.
Okwa ti vati oshiningwanima eshi osha ningwa lwopotundi 02h00.
Shikwambi okwa ti nakutulamo oshipofa okwa lombwela opolifi kutya Noa okwe mu dengela manga a li koilonga Etitano ndee te mu shivi kOniipa va ka tyapule eshi a mona oilonga ipe.
“Nakutula mo oshipofa okwa ti kutya ke na oshimaliwa sholefa, ashike omutamanekwa okwa ti ote mu futile ndee ta ti na tulwe poshivelo shoshipangelo shaNandjokwe,” olopota yoimbuluma tai ti.
Shikwambi okwa ti nakutula mo oshipofa okwa ti ova ya konduda yaNoa, oko va ka nwa omalodu.
Nakuningwa oshihakanwa okwa lombwela opolifi kutya Noa okwe mu landela okabiila manga inave lidenga moutota vovodka.
Natango okwa ti vali Noa konima okwa tula ovodka moukopi vavali ndee ta i navo mokombifa.
“Eshi nakuningwa oshihakanwa a pula kutya omolwashike oikunwa ya twalwa kokombifa, omutamanekwa vati okwa ti okwa ti okwa weda mo okaima ka nyika ‘okangongo’,” Shikwambi ta ti.
She likolelela kopolifi, nakuningwa oshihakanwa okwa ti konima a nwa mo luvali, okwa mona mo oshinima sha fa opela tai hengumuka ndee ta tameke a hala okukunga.
“Nakutula mo oshipofa okwa li ta kendabala okukuwa ashike kapu na nande omunhu e ya oku mu vatela. Okwa kunga yo vali pefimbo opo,” osho a ti ngaho.
Opolifi oya ti nakuningwa oshihakanwa okwa dula omutamanekwa eenghono ndee ta kendabala a faduke po, ashike omuvelo okwa li wa pata.
“Nakutula mo oshipofa okwa denga mo ekende nongonyo, ta londo ndee ta faduka po.
Okwa lombwela yo opolifi kutya okudja opo ita dimbuluka vali osho sha ningwa po okwe ke li hanga ashike e li moshipangelo,” Shikwambi ta ti.
Nakuningwa oshihakanwa oo ha di kOnangolo popepi nEenhana, okwa li a twalwa komakonakono opaunamiti.
Opolifi oya ti aveshe nomutamanekwa ova ningilwa omakonakono ekwatongonga.
Opolifi oya ti, nakuningwa oshihakanwa, oo kwa li ha shingi oteekisa, okwa shakena naNoa oshikando shotete muMei konima kwa li a londa motuwa yaye.
Konima, ova panga oukaume.
Noa okwa holoka mOmhangau yaMangestrata mOndangwa onghela.
Omo aanyenwa obooloha. Omhangu tai ti ekwatongonga oshimbuluma sha kula noshipofa shaye oshi na oumbangi wa wana.
Epangelo natango ola ti oku yandja obooloha komutamanekewa kashi li mouwa wouyuki, tali ti kutya otashi dulika a ka piyaaneke eembangi ile omakonakono oo e li metifa, a ka ninge vali oshimbuluma sha fa eshi, ile a faduke po mwolwehandukilo olo ta pewa ngee okwa monika ondjo.
Mangestrata Nelao ya France okwa undulila oshipofa eshi komafiku 27, 30 no31 Juli 2026 kuningwe eindilo lobooloha. Oshipofa otashika udika momafiku 29 Oktoba.
