OMUNANGESHEFA a tseyika nawa moshitopolwa Oshana tate Andreas ‘Sand of Armas’ Armas okwa li gandja omapole nomapandulo koosipana ndhoka hadhi dhana oliha yaMaalala mOshana.
Shika osha li sha ningwa mEtitano komatango pongeshefa yomusamane Armas pOmaalala mpoka.
Poshiitahanene shoka sha li sha kalwa kaawiliki osho wo aadhani yoosipana adhihe dhomoliha yaMaalala dha konda pomulongo, oosipana odha li dha pewa, oombandi, oonzapo nosho wo iimaliwa shi ikwatelea kutya odha longa ngiini momaudhano gadho ngoka gokatanga kokoompadhi.
Osipana ndjoka ye ya yi li pombanda moliha yaMaalala oyo ndjoka yo Young Brave hayi yambuka mOndangwa.
Osipana ndjika oya pewa ekopi, oombandi dhoshingoli nosho wo oshimaliwa N$1 575. Osipana ontiyali moliha oyo Brave Lions ndjoka ya pewa oombandi dhoshisiliveli nosho wo N$125. Shoka she etitha oshimaliwa shi kale oshishona ngeyi, omuwiliki gwoliha ndjika yOmaalala, omusamane Herman Kalimbo, okwa ti kutya aanambelewa naadhani yosipana ndjika oye shi shi nale.
The Namibian okwa kundanekwa ngaa konzo yimwe kutya aamentu yosipana ndjika oya fa ya li inayi ihumbata nawa oshikando shimwe, sho osho she eta oombongo dhawo dhilwe ya kale ina ye dhi mona ongegeelo.
Osipana ontitatu,ontine nontintano ndhoka wo dha pewa omagano goshimaliwa noonzapo odho Ombutilo (N$800 nonzapo),Tena-City (N$ 700 nonzapo) noshowo Fish Consumption (N$ 500 nonzapo).
Pethimbo ta gandja omagano ngaka nokupopitha aadhanitanga naanambelewa yawo, omusamane Armas okwa pandula noonkondo aasindani yoliha yOmaalala unene tuu mokkiitula muudhano.
Okwa popi ngeyi kutya omaudhano oshinima sha simana shoka hashi kaleke po uundjolowele wolutu nomadhiladhilo, wo ishewe ohawu keelele opo omuntu ki itule miininma nenge a kalonge iilonga ya puka mbyoka yi li ompinge nehalo nenge elandulathano lyoshigwana.
“Aasindani yoliha onda hala ndi mu lombwele kutya otandi mu landele uumbindja.
Oshoka owala nde ya meendelelo andola onde wu etelela, mwe wu pewa kuSand of Armas.
Ondi wete oshikando tashi landula sho tandi ke ya oku uka pehulilo lyomwedhi otandi ka lombwela Kalimbo a kwatathane nane ne mu pewe uumbindja weni,” Armas, ngoka e li gumwe gwomaayambidhi yoliha ndjika ta lombwele osipana yoYoung Brave ngaaka.
Omusamane Herman Kalimbo ngoka oye e li omuwiliki gwoliha ndjiaka yOmaalala okwa lombweleThe Namibian ta ti kutya yo oyi itula mo mokuyambula po uudhano mbuka wetanga lyokoompadhi, ashike oya taalela ngaa omashongo molwashoka kapu na naana aakwashilipaleki mboka taya vulu oku kwatha opo uudhano ye wu fale pondondo ndjoka ya hala.
Okwa tumbula kutya nuumvo oosipana 10 odha kuthile ombinga muudhano woliha ndjika. Odho nee ngaashi: Young Brave, Brave Lions, Ombutilo,Fish Consumption, Dr Hage Geingob, Omusati United, Oluno Correctional Services, JK, Ondangwa Youth noTena-City.
“Tse yene otatu kambadhala.
Oliha yetu oyi na oonkondo koshitopolwa huka, noosipana odhindji dha za moliha yetu odhi li nale koliha yedhingoloko etiyali hoka tadhi shi enditha nawa,” Kalimbo ta ti ngaaka nokugwedha po kutya oya kala ngaa omathimbo ga piti nokwiithana aanapolotika ya kale haya kala piituthi yawo yomagandjo gomapole nelalakano andola ye ya kongele ngaa eyambidhidho mpeya naampeyaka ihe oya ka mona kutya itashi kwathasha molwashoka aanapolotika mbaka ihaya galuka we ngele ya ka ningina ko nande yu uvaneka taya ka galuka mbala.
“Otwa tokola opo tu kale tatu ningi owala iinima yetu kutse yene.
Ashike otwa hala ngaa kehe ngoka ta vulu okuyambidhidha mpoka ta vulu, unene tuu aanangeshefa, opo e tu kwathele,” Kalimbo ta gwedha po.
Komatango gesiku ndyoka okwa li kwa pewa aadhani yaali oshimaliwa.
Oyo nee Lameck Uusiku, ngoka oye omutulimo gwookoola odhindji nosho wo Ahtisaari Shipanga, ngoka oye omudhani u ulika omaihumbato omawanawa moshikako shuudhano woliha yonuumvo.
