Omunambelewa akula woinamwenyo moministili younamapya nounaimuna, eeshi, omeva nomatendululo omadu, Dr Kenneth Kennedy Shoombe, okwa ti oshilongo osha katuka onghatu i shii okupandulwa mokulwifa oudu wendabi, nande eevanda natango odi li koshi yeepelesenda o-70.
Eepelesenda edi odo da pumbiwa opo kududwe mo filufilu omukifi wendabi koitopolwa yokonooli.
Shoombe oshinima eshi okwe popya koshoongalele shetalululo lopoloyeka nomafaneko endabi sha ningilwa kOndangwa Etitatu.
Okwa ti eembwa di li dulife po157 000 okwa li da vendwa momudo 2024, omwaalu wa kalela po eepelesenda di li o-61 deembwa.
“Momudo 2024, ombelewa yomayakulo oundjolowele woinamwenyo oye shi pondola okuvenda eembwa di dulife po157 000.
Omwaalu wa kalela po eepelesenda di li o-61 deembwa,” osho a ti ngaho.
Shoombe okwa ti momudo 2025, eembwa di li lwopo124 000 okwa li da vendwa, omanga di dulife po31 000 koumbuwanhu womufinda utilyana nado kwa li da vendwa.
Nande pwa ninga eyokomesho eli, okwa popya kutya oshilongo natango inashi hanga eepelesenda di li o-70 odo da shonekwa.
Eepelesenda odi, odo da pumbiwa opo omukifi ou ududwe mo filufilu meembwa.
“Nande inatu hanga natango eepelesenda detu di li o-70 odo twa shoneka, eenghendabala edi oda holola onghatu ya fimana mondjila yetu yokududa mo omukifi wendabi,” osho a ti ngaho.
Shoombe okwa ti omwaalu woudu wendabi owa ya pedu neepelesenda di li omulongo pashiwana momudo 2024.
Osho tashi ulike eshunopedu lendabi moimuna nomeembwa.
Ashike nee, okwa ti oitopolwahoololo imwe otai twikile nokudidilika eepelesenda domukifi ou da koyelela po30, osho sha nyika oshiponga kovanhu.
Eshi kwa li ta popi koshivilo oko tuu oko, omuunganeki wopoloyeka yendabi a dja kehangano loundjolowele woinamwenyo lopaunyuni, a kelela po oilongo yokoumbuwanhu waAfrica, Dr Tenzin Tenzin, okwa ti omafyo ovanhu a etwa kendabi konooli yaNamibia aa shuna pedu momido omulongo da pita.
A dja pomafyo e li o-23 komudo okuya pomafyo avali ile nokuli limwe.
“Petameko lopoloyeka, omwaalu aushe kumwe womafyo ovanhu va lika keembwa okwa li u li po23 moitopolwa yokonooli, ndee konima yetulomoilonga lopoloyeka, omwa xupifa eemwenyo dovanhu eshi mwa kelela vaha kwatwe kendabi, omafyo aa shuna pedu fiyo opulimwe ile avali,” osho a ti ngaho.
Tenzin okwa weda po kutya eevenda deembwa oda ya pombada okudja peepelesenda o-20 fiyo opo650 no60. Nomukifi wendabi meembwa nomoinamwenyo ikwao yomomaumbo owa ya pedu.
Opoloyeka okwa li ya patululwa moshitopolwahoololo shaShana momudo 2016 nokudja opo oye lihanena oitopolwa ikwao yokomikunda konooli yoshilongo.
– NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
