Ovanaudu ve li o-500 koKavango Ushilo nokoZambezi ova teelelwa va ka hakulwe koshikonga shopashiwana shokutanda ongala komesho sha patululwa moitopolwahoololo omo Omaandaxa.
Oshinima eshi otashi ningwa keengudu domatando okudja koWindhoek Central Hospital, oondokotola vopaumwene okudja koNorthern Vision Centre novaliyambi vopaunamiti vopaunyuni okudja koGermany naAmerica.
Otashi i fiyo Etitano notashi lalakanene okuyakula omesho ovanadu.
“Otwa tanda ovanaudu ve li o-99 (Olomakaya), onghela (Oshoondaxa) otwa tanda ve li 101 ndee ohatu lalakanene okutanda ve li o-500 okudja moshitopolwahoololo shaKavango Ushilo noZambezi,” ondokotola yomesho Helena Ndume tai ti.
Ngoloneya woshitopolwahoololo shaZambezi, Dorothy Kabula, moshipopiwa shaye pepatululo loshikonga eshi, okwa ti kutya okuhakula omesho moshiwana taku ningwa kuNdume oshinima sha fimana pashiwana.
Okwa weda po kutya she likolelela komivalu doundjolowele paunyuni, ongala oi li natango oshinima osho hashi ningi ovanhu ovapofi tashi dulu okukelelwa mounyuni aushe, neepelesenda o-40 dovanhu ve na ounghundi womesho mounyuni owa etwa koudu wongala.
“Omivalu detu paife domudo woshimaliwa 2025/26 oda holola kutya oshipangelo shaKatima Mulilo osha mona ovanaudu ve na ongala ve li 308,” ngoloneya ta ti.
Kabula okwa holola kutya oshikonga sha faafana osho okwa li sha ningwa koRundu odula ya dja ko osha tanda ovanaudu ve li 104, ashike okwa li kwa shaala ve li o-200 inava mona omayakulo.
“Ohandi indile ovanawino vetu va twikile nokulonga oilonga yavo iwa manga tava alula omesho Ovanamibia. Oilonga yavo kai shi ashike oilonga yongaho, omaano okudja kuKalunga.
“Ongala oshinima shakula hashi eta owike, okulikalela, osho hashi eta ovakulunhu moshiwana shetu va wililwe po komadilaadilo shaashi ihava dulu vali okulonga sha,” Kabula ta ti.
Omunaudu umwe a tandwa, Dominic Kupembona a dja koNyangana moshitopolwahoololo shaKavango Ushilo, okwa holola olupandu, ta ti okwa hafa eshi eisho laye lokolumosho, olo kwa li ihali mono ko nawa, la hakulwa Oshoondaxa ndee paife oku wete ko nawa.
–NAMPA
