Banner Left

Ovanapolitika otava pula opo Namdia a patwe

Efano: La yandjwa NAVA FI YE PO OILONGA … Eengudu domilameno otadi pula opo elelo laNamdia li fiye po manga oilonga ku ningwe omakonakono a manguluka.

Omapulo okupata ehangano lokawe ledina Namib Desert Diamonds (Namdia) okwa ninga ahapu konima yomunyeka wokawe kongushu yeemiliyona N$350 momafiku 18 Januali, oo ovanhu vamwe tava ti okwa li oshinima sha longekidwa kovanhu vomeni lehangano.

Ovandjadjukununi, mwa kwatelwa omuleli wongudu yoRepublican Party (RP) Henk Mudge, okwa ti ota wilikwa papuko nokashi li mondjila.

Omunyeka, oo wa eta efyo lomukulunhu weameno waNamdia Francis Eiseb (57) nomukulunhu woilonga waTrustco Max Endjala (44), okwa eta omalimbililo kombinga yomilandu deameno lehangano, neengudu domilameno otadi pula kukalelwe po oshinima eshi nomalunduluko yoo.

Omanga dimwe tadi feekele kutya opolifi nayo oya kufa ombnga moshinima omu, dimwe, ngaashi ongudu yoPopupular Democratic Movement (PDM), otai pula opo elelo laNamdia li tulwe pedu moilonga manga opo kukwashilipalekwe kutya okwa ningwa omakonakono opauyelele.

Namdia ota ti oilonga yaye inai kumwa eshi taku ningwa omakonakono.

“Kndi wete kutya omolwashike ehangano ngaashi Namdia la pumbiwa.

Ewiliko ashike limwe la nghundipala tali hepeke eemiliyona dihapu keshe kodula nokakwa li la pumbwa okukala po,” Mudge osho a ti ngaho Omaandaxa.
Okwa ti ovanailonga vamwe ova pumbwa okutaatawa.

“Fiyo opapa eshi ndi wete, Namdia nai dilwe novanailonga vahapu nava taatawe,” Osho a ti ngaho.

Namdia okwa li a totwa momudo2026 okupitila meudafano lopangeshefa pokati ka De Beers nelalakanao lokulandifa okawe inaka wapalekwa

paunyuni opo ku vatelwe epangelo laNamiba li one kutya okawe kalo oke na ongushu i fike peni.
Mudge okwa ti opolifi otashi dulika i kale ya kwatelwa mo momunyeka.

“Oshinima ashishe oshi li po ngaa ngaha ndee kapu na naashi tashi etwa poluheela.
Opolifi tai longo oilonga yayo ndee komufalandjai okwa pumbwa okutala oshinima eshi meendelelo.

“Otu na oiholelwa ihapu omo polifi ya kwatelwa moinima youlingilingi ndee oshinima eshe osha pumbwa okuxulifwa po meendelelo,” Osho a ti ngaho.

OVAAFEEKELWA
Ovafeekelwa vatatu ova monika shin a sha noshiningwanima eshi: Endjala, mumwaina Joel Angula (45) naSam Shololo (45).

Omupopiliko wopolifi wopashiwana omupedu komufala Kauna Shikwambi Omaandaxa okwa koleka kutya Shololo okwa lekelwa okudja moshipangelo shepangelo mOvenduka.

Okwa li vati a mona oshiponga koipute yondjebo pefimbo lomunyeka nokwa li a kwatelwa meembete doshipangelo onguloshi oyo oshiningwanima eshi sha ningwa.

Angula okwa lia holoka momhangu oshivike sha dja ko noshibofa shedipao, omunyeka wa homata, okukala e na okawe kehe inaka tetwa noibofa ivali yonghedabala yedipao. Oshibofa osha undulilwa komesho komafiku 23 Mei opo ku ningwe omakonakono amwe.

Omupedu pelesidente wongudu yoNamibia Economic Freedom Fighters (NEFF) Kalimbo Iipumbu Omaandaxa okwa ti epangelo ola pumbwa okukwashilipaleka kutya Namdia oku li koshi yoministili yoikwamina noikwanghono opo li amene okawe koshilongo.

Okwa ti epangelo inali kala le lipaka mo momilandu deameno di na sha nokawe. “Omunyeka oshinima sha kula osho epangelo osho tashi ulike kutya epangelo inali fimaneka eameno lomamanya etu ongushu.”

“Ovanu ovo ve li oko, omukulunhuwiliki nomukulunhuwiliki weameno, kakwa li lela ve na owino wokukala nokawe. Okukala nokawe iknaku fa okukala noshimaliwa koshi yombete yoye,” Iipumbu osho a ti ngaho. Okwa ti omunyeka ou na okukala wa longekidwa nawa.

“Eshi oshinima kwa li sha longekidwa fiyo ovanhu va otava faduka po nokawe oko kwa li ke na okuxwepopaleka eenghalamwenyo dOvanamibia. Onghenda inene eshi ovanhu vamwe va kanifa eenghlamwenyo davo,” Osho a ti ngaho.

OMAPULO INAA NYAMUKULWA
Odjo imwe yomeni oshivike sha dja ko oya lombwela oThe Namibian kutya omunyeka okwa li u na okuningwa momafiku 17 Januali.

Iipumbu okwa tya ko sha kombinga yoshinima eshi, ta ti: “Omunhu oto kumwa nee kutya oshike sha ningwa po efiku olo.”
Epeko lopolifi ola patululwa, li na oibofa omwa kwatelwa shomunyeka kwa homatiwa nedipao.

Angula, oo kwa li a ya komhangu oshikado shotete, omunambelewa wopolifi mukulu noku li mumwaina waEndjala, o otaku tiwa okwe liyasha pefimbo lomunyeka.

Angula naye oumwe womongudu yeameno laNamdia notaku tiwa vati okwa li a fanduka po ndee tai keumbo laye nokawe kamwe momafiku 18 Januali.

Okwa li amangwa po efiku olo eshi kwa li kwa lopotwa kutya okwa hangika e na ouwe meumbo.

‘INAU FIMANA’

Natango, hamushanga wevava lovanyasha loSwapo Ephraim Nekongo okwa ti omunyeka waNamdia inau “fimana””.
“Oshike naana sha fimana kombinga yomunyeka waNamdia? Kandi wete ngee osho papolitika. Ovanhu nava longe oilonga yavo ndee tava kwata ovo va kwatelwa mo,” Osho a ti ngaho.

Nekongo okwa ti okupata Namdia oshikundafanwa shefiku li lili.
Omupopiliko wongudu yoIndependent Patriots for Change (IPC) Imms Nashinge Omaandaxa okwa ti omunyeka ou oshinima sha kilikita.
“Fyee ongoIPC katu na eshi tu shi notai tu ka tya ko sha kombinga yasho. Oilonga yopolifi oyo,” Osho a ti ngaho.

Pelesidente wongudu yoNational Unity Democratic Organisation Esther Muinjangue okwa ti okwa li kofaalama yaye eshi oshiningwanima sha ningwa.
“Ondi li mondjila nda yuka kOvenduka nohatu ke mu pa enyamukulo letu li yadi konima yefimbo nena,” Osho a ti ngaho.

‘LUNDULULENI OMUKULUNHUWILIKI’

Oshivike sha dja ko oThe Namibian okwa li ya lopota kutya palesidene wongudu yoPDM McHenry Venaani okwa pula opo omutumba wovakulunhuwiliki vaNamdia va yandje omhito opo opolifi i ninge omakonakono.
Okwa pula minista woikwamina Tom Alweendo opo a hoolole ‘omukulunhuwiliki wopakafimbo’ opo a ye ponhele yomukulunhuwiliki waNamdia Alisia Amupolo.

“Omukulunhu weameno lakufwe moilonga. Omukulunhuwiliki na kufwe moilonga ndee taku ningwa omakonakono kutya oshike lela sha ningwa po. Ewilikongudu laNamdia nali kufwe moilonga,” Venaani osho a ti ngaho.

Natango okwa pula yoo vali opolifi opo i kufe mo ovanambelewa vopolifi momakonakono ovo tava feekelwa kutya navo ove na mo olunyala momunyeka omu.

Kakukutu komatango opolifi mukulu Sebastian Ndeitunga Omaandaxa okwa ti ovanailonga vepangelo vamwe otava longele kumwe neengangala.

“Ondi wete kutya ove shin inga ve na ouyelele okudja meni ile elongelokumwe lomeni novanhu vonhumba ovo ve li ovanailonga vehangano., ovo tashi dulika ovo va yandja ouyelele waasho tashi linyenge mehangano,” Ndeitunga osho a ti ngaho.

Momukanda wokoikundaneki oshivike sha dja ko Amupolo okwa ti Namdia natango okwe litula mo mokuyandja ouyelel koikundaneki kutya oshike sha ningwa po konima yomunyeka.

Ehangano ola pitifa ouyelele ou konima la undulila komesho oshoongalele shokuyandja ouyelele koikundaneki osho kwa li shi na okuningwa Etitatu la dja ko oshikando oshitivali.

“Molwomakonakono e li metifa, okwa li sha monika kutya oshi li mondjila okuundulila komesho oshoongalele shoikundaneki osho kwa li sha fanekwa shi ningwe.

“Ohatu ka kala nee hatu dulu okumupa ouyelele womondjila kutya otashi ende ngahelipi kombinga yomakonakono opolifi nomakonakono omeni,” Amupolo osho a ti ngaho.

Okwa ti ouyelele otau ka kwatela mo kutya oinima ingapi oyo kwa li ya vakwa po ya monika.

Ovanailonga vaNamdia otava ono exungomwenyo neyambidido, osho a ti ngaho.
“Ongeshefa yetu oya patuluka noilonga inai kumwa nande.”

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News