Eshi opaliamente ya patuluka Etivali, oshiwana osha pula oilyo yopaliamente i fimaneke ekufepo loluhepo, eyandjo lomayakulo netoto loilonga, vamwe ova yandja nokuli omaliudo a yooloka okutala koilonga yomudo wa dja ko.
Eshi kwa li ta popi noNampa mOvenduka, omukalimo Paul van Wyk okwa ti nande okwa li pa ningwa eyokomesho moinima imwe omudo wa dja ko, okwa pumbwa natango okutalwa kokuxwepopeka onghalo momalukanda.
“Ova ninga nawa moinima imwe, ashike eeveta dimwe okwa li da tulwa moilonga ndee itadi vatele sha nande ovanhu ovo va pumbwa evatelo,” sho a tio ngaho.
Van Wyk okwa yeleka kutya oluhepo natango oli li omukundu wakula nande Namibia oku na eedjo dopaushitwe da matutu noshiwana shishona. “Fyee oshilongo shi na ovanhu vashona neliko lihapu, ashike natango opu na ovanhu vahapu tava hepa ve li meenghalo dihe li nawa momalukanda,” osho a ti ngaho, ta weda po kutya epangelo nali fimaneke okuwapaleka omadu nomaumbo e na ombilixa li xwepopeke omaxupilo.
Okwa weda po vali kutya omalelo naa tale kokuyandja omadu a wapelekwa oshali kovakalimo omangha taa pitike va futile omeva nolusheno keshe efimbo.
Natango, Natangwe Simon okwa ti mangha opaliamente ya holola eenghendabala odula ya dja ko, ovanapaliamente nava tale kokuwanifa po omaudaneko a ningilwa ovahoololi nokuxwaxwameka enghonopeko leliko.
“Nava dimbulukwe apa va dja nomaudaneko oo va ningila ovanhu ovo ve va hoolola,” osho a ti ngaho.
Okwa yeleka kutya opaliamente nai fimaneke oinima oyo tai nghonopaleke oshiwana shi tote eemhito doilonga dasho vene ponhele yokukala ashike sha tala mepangelo.
“Inatu hala ovaleli ovo hava tu ashike eemhata nokupataneka vakwao.
Otwa hala ovaleli ovo tava eta exumokomesho nokulonga ovanhu nghee ve na okutota oilonga voo vene,” osho a ti ngaho.
Ovakalimo aveshe ova popya kutya opaliamente ohai dana onghandangala ya fimana mokukwatela eyambukepo lopashiwana nova pula ovatotiveta va kwashilipaleka kutya eeveta odo tadi totwa otadi eta eyokomesho loshiwana li li wetikile.
-NAMPA
