Ovanambelewa vepangelo vakula va shuna moilonga okudja moshipundi shetulumuko

Oministili youyuki oya alulila ovanambelewa vepangelo vakula vavali moilonga konima yeemwedi nhatu eshi kwa li va ya moshipundi shetulumuko.

Ovanambelewa ava ovo nee haende Matti Asino nosho yo omuyandjimayele paveta omukulunhu Chris Nghaamwa.

Asino, oo e li omutekulu womukokoli pelesidente Sam Nujoma, ota ka longa ongomwoongeli weengunga, omanga Nghaamwa a shuna ponhele yaye ikulu ongomuyandjimayele paveta akula kuhandendjai, Festus Mbandeka.

Omukulunhuwiliki woministili youyuki Gladice Pickering okwa popila euliko laNghaamwa, ta ti ola pumbiwa nola kolekwa nomatomeno awa.
Eshi oshe ya konima yeedula nhano eshi hamushanga woKabinete, George Simataa, a pula momukanda womafiku 15 Marsa 2019 omo a

dimbulukifa eeministili adishe depangelo nomahangano e liufe keedula dokuya moshipundi shetulumuko momayakulo opashiwana.

Eedula dokuya moshipundi shetulumuko moNamibia odi li 60. Okuya moshipundi shetulumuko diva oku lipeedula 55 osho hashi dulu okuningwa nepitikilo lomuprima minista.

“Ovanailonga aveshe nava ye moshipundi shetulumuko ngee va wanifa eedula 60, kakele ashike ngee okutwikila noilonga konima yomido odo okwa kolekwa komuprima minista ngaashi okomisi yomayakulo oshiwana tai ti,” Simataa osho kwa li a yandja elombwelo li li ngaho.

Asino okwa li a ya moshipundi shetulumuko momafiku 31 Mei, konima eshi a wanifa omido 60 momafiku 12 Mei.

Okwa li a ulikwa a kufe po omhito yoilonga oyo momudo 2009.

Nghaamwa okwa li a ya moshipundi shetulumuko muJuni konima eshi kwa li a wanifa omido 60 momafiku 21 Juni 2024.

Aveshe okwa li va alulilwa moilonga Etivali loshivike sha dja ko.

Haende Frieda Matsi oye haende wepangelo tava tele.

Oiwana yahangana oya ti, ondodo yokuhena oilonga moNamibia oi li peepelesenda 34 ndee okuhena oilonga kwovanyasha oku li peepelesenda 48 okudja muAuguste 2023.

MuJuni, omunapaliamente wongudu yoLandless People’s Movement (LPM) Utaara Mootu okwa li a pula minista wouyuki Yvonne Dausab kombinga yokuulikulula ovanhu ovo ve li moshipundi shetulumuko va alukile moilonga yepangelo. “Omufimanekwa Dausab, Mr Asino okwa wanifa omido 60 nokwa ya moshipundi shetulumuko omwedi wa dja ko. Ashike nee, eshi a fiya po ombelewa, okwa li twa lombwelwa kutya, okwa fiya a pula omunambelewa mushona opo a file oshisho okameno oko ke li mombelewa yaye shaashi ota ka aluka diva,” Mootu osho a ti ngaho momutumba wopashiwana.

“Ashike okwa li shili a shunwa moilonga mombelewa yoohaende vepangelo. Otu udite ko kutya omayakulo epangelo okwa yandja oufemba komunhu opo a dule okutwikila noilonga konima yeedula dokuya moshipundi shetulumuko molwowino neenghono davo, oo wa pumbiwa momahangano omayakulo oshiwana,” Osho a ti ngaho.

Mootu okwa pula kutya ovanhu ovo ve li meedula dopendjela ove na naana owino nounongo wa pumba wa fa shike.

“Okuhoololululwa kwaye oku na sha nopolitika ile pamwe oku na sha nomauwa amwe opolitika mombelewa omo ovanapolitika va yooloka vongudu tai pangele ovo va pumbwa omunhu e li meni a kwatele komesho oikumungu yonumba yavo yopaveta?” Osho a pula ngaho.