Ovanailongo vofitola yedina Choppies kOmuthiya, Ondangwa, Ongwediva nOshakati, okwa li va ninga ehololomadilaadilo lopambili Etine, tava pula eendjabi neenghalo doilonga di li xwepo.
Komuthiya, ovanailonga okwa li va yandja omukanda kovakalelipo vofitola yavo komesho yovanambelewa okudja kehangano ledina Namibian Food and Allied Workers Union (NAFUA).
Momukanda, ovanailonga ova lundila Choppies kutya okwa kala noku va futa okamaliwa kashona oule womido hetatu da pita notai fimaneke eefuto odo da tulwa po kepangelo.
Tava holola kutya ohavafutwa oshimaliwa shi fike poN$8 movili, osho sha yela kutya mefiku ohava futwa oshimaliwa shi fike poN$64, oshi sha eta ondjabi yavo i kale i fike poN$1 560. 00 komwedi.
Eshi kwa li ta popi noNampa, omuunganeki woNAFAU wopashitopolwahoololo Sesilia Endjala okwa ti Choppies natango ina futa oimaliwa yovanailonga ovo kwa li va kufwa moilonga muMarsa.
“Konima a kufa ovanilonga moilonga muMarsa, ove va kuta keekondalaka, osho shi li oilonga yongaho nehepeko lovanailonga Ovanamibia,” osho a ti ngaho.
Endjala okwa ti kutya ongehangano lovanailonga, ova hala Choppies a fimaneke eeveta daNamibia nongushu yOvanamibia ovo hava longo.
Omudidiliki womauyelele woChoppies Imelda Somses okwa ti kutya ota holola omadilaadilo aye shaashi ina hafela nande nghee ovanailonga have liumbatelwa koilonga.
Ovanailonga ova pa ewiliko omafiku omulongo opo li kale le va nyamukula, ngee ova dopa oku shi ninga otashi eta va kufe onghetu inai tumbulwa.
Lyedia Negumbo, oo e li ta wilike Choppies kOmuthiya, okwa anya okutya sha.
