Ovalumenhu vahapu ihava popi ngee tava mono oixuna shaashi ova itavela kutya ove na okutaalela omikundu donghalamwenyo ovo aveke, omuyandjimayele nomauyelele kombinga yonghalamwenyo nongeshefa Sidney Boois ta ti.
Boois edi okwe di popya oshivike sha dja ko pefimbo loshivilo shi na sha noundjolowele wopamadilaadilo koEros Primary School mOvenduka.
“Ovalumenhu nava tameke okupopya ndee tava popi mo oinima aishe mokule shaashi okupopya oko etameko leveluko,” Boois ta ti.
Okwa ti ondodo yotete yeveluko lopamadilaadilo okupopya, noho oundjolowele wopamadilaadilo kashi shii okuhenuka omikundu ashike okulihonga nghee u na oku di nyamukula.
Boois okwa twa ovalumenhu omukumo ve liyambidide ndee tava konakona nawa ngee ookaume kavo tava monika va fa tava mono oixuna.
“Otu na okutonatela vakwetu, tu tale kutya ohatu va vatele ngahelipi,” osho a ti ngaho.
Omapopyo aa ee ya eshi oshilongo tashi twikile nokudidilika oningwanima ihapu yomalikufo eemwenyo.
Odula ya dja ko, Oministeli yOundjolowele nOmayakulo Opanghalafano nEhangano lOundjolowele lOpaunyuni ova holola kutya Ovanamibia ve li 474 ova xulifa eshi ve likufa eemwenyo.
Omudeuli wokatanga kokeemhedi Costa Khaiseb okwa ti eenghundafana da manguluka otadi dulu okuvatela ovanhu va popye mo omikundu davo kombinga youndjolowele wopamadilaadilo nokutwa ovanhu vahapu omukumo va konge eyambidido.
Omudani woudano woHockey Berthwell Sabisa okwa ti oshinima shimwe sha kula e lihonga koshivilo oku osheshi kutya ovanhu inava kala ve wete ovo aveke ngee ve li meenghalo didjuu.
Annalize Tjipanga okwa hokolola nghee omukanda wa dja komonamati wa lundulula nghee e na okutekula. Okwa ti omalineekelo aye okwe mu tula unene moudjuu.
“Pokati koku mu vatela noifiilwalonga yaye yofikola, oku mu twala kofikola, ketanga nokukwashilipaleka kutya alushe oye dingi mukeshe shimwe, okwa li ndi shii ohandi ningi keshe osho omudali muwa a pumbwa okuninga.
Okwa li nde mu tula moupyakadi wa kula,” osho a ti ngaho.
