Ovakalimo vomOvenduka kolukanda laGoreangab ova nyenyeta kombinga yeendjima tadi ponokele eebashu davo nokuvaka mo oikulya yavo .
“Oda ya nomacaroni ange noufila woikuki oshivike sha dja ko,” Kaumbo kaNangula osho a ti ngaho. “Onde di hanga meumbo lange ndee kakwa li handi dulu oku di taata ya mo shaashi ngeno oda dipaya nge.”
Ongudu yeendjima luhapu ohai kala ya londa komaumbo ongula keshe efiku, lwopotundi 06h00 no11h00.
KaNangula ota indile oministili opo i twale ovanambelewa veameno konhele oko va ka wilike eendjima, ta ti ovakalimo ova tila okukatuka onghatu voo vene.
Ovakalimo ova ti ova kala nokutuminwa keenhele da yooloka, mwa kwatelwa elelodoolopa laVenduka noministili yomidingonoko nomatalelepo, puhe na evatelo lasha.
Omupopiliko woministili yomidingonoko Vilho Angula okwa ti oupyakadi woondjima konhele oko owa dja nale. Ashike okwa ti epangelo otali ka tumina ko ovanambelewa ve ke di tilife deehene ko.
Angula natango okwa ti okuwilika oinamwenyo konhele oko oshidjuu shaashi oi hadi neenghono.
Eenghendabala dimwe odo da ningwa koministili, ngaashi okutula po odalate pokati kolukanda naa po hapa di eendjima, oya va kwa ko nokutetaulwa kovanhu ovo kwa li i na okwaamena.
“Ongudu otai ka tilifa eendjima di ye ndee odo itadi ka ya, otadi ka kwatwa ndee tadi twalwa kokule noshiwana, keenhele ngaashi meendudu daNaukluf.
Ohatu indile ovakalimo konhele oko va kwate nawa omakako avo, opo aha nanene eendjima momaumbo avo,” osho a ti ngaho. Okwa weda po kutya oministili oya faneka okukundafana novakufimbinga ngaashi muni oshivike eshi opo i konge enyamukulo laalushe.
Odjo yakula moministili oya ti oshinima ashike osho tashi dulu okuvatela, okuyasha ashike eendjima edi. “Otwa ninga nale oshinima osho. Otwe shi ninga koKleine Kuppe, Avis noKlein Windhoek,” omunambelewa osho a ti ngaho.
Odjo , nande ongaho, oya ti kaku shiivike kutya oku na eendjima ngapi konhele oko, shaashi ihadi kala ashike ponhele imwe opo di dule okuvalulwa.
Efiku keshe koGoreangab Dam mOvenduka moshikandjohoololo shaSamora Machel, ovakalimo ohava kala va idila omaumbo avo opo va kelele eendjima dihe uye momaumbo avo.
Kovakalimo ngaashi Josefina Nakwatumba, eendjima kadi fi vali oinamwenyo yomoixwa i li kokule, ashike ovaenda inava shifwa ovo hava fininike eefamili di kale da tonata keshe efimbo.
Ohadi vake noikulya, tadi tileshi omeva oo ovakalimo hava ka tala kokule nokunina keembete.
Ounona ihava i vali kofikola ovo aveke shaashi ove na oumbada neenghono, nelineekelo kutya otava kala va amenwa ngee eendjima da nuka meendudu odo di li popepi.
Ovadali luhapu ohava i nounona vavo ngee tava di momaumbo.
“Eendjima edi ohadi teya po omakumba opo di ye momaumbo etu. Ohadi denge nounona vetu ngee ve na oikulya molukanda,” Nakwatumba osho a ti ngaho.
Ovakalimo ova ti oupyakadi ou owa naipala, eshi eendjima hadi holoka momwaalu muhapu lwopotundi 06h00.
Paulus Jonas oo a kala molukanda omo oule womido nhano nokaana kaye okwa li ka ponokelwa konima yomido nhatu da pita okwa ti eendjima oda nyatipala, tadi dipaya nokulya po oinamwenyo ishona ngaashi eembwa.
Ovakalimo ohava denge nee omandoloma opo di ehene ko, shaashi ngee tadi tilifwa ihadi lu naana.
Linda Hange okwa ti eendjima ohadi teyaula po yoo vali oimeno yavo. Ngee tava kendabala oku di taatayelashi, dimwe ihadi linyenge, da hala vati okulwa.
Oinamwenyo ei vati oya dipayele okaana keemwedi nhano momudo 2022 nokulemaneka okaana kamwe, oko kwa li ka ya moshipangelo.
Kamusela woshikandjohoololo shaSamora Machel, Lydia Kanime okwa ti ita dulu okutya sha shaashi ovakalimo inave mu lopotela nande oupyakadi ou, omangha omupopiliko welelodoolopala laVenduka Lydia Hamutenya okwa ti muni oha vatale ashike oministili mokuungaunga noinamwenyo.
Omupopiliko wopolifi yoshilando Marcelline Murapo okwa ti opolifi ohai uya mo ashike moshinima omu ngee opu na eendjima dihapu unene odo oministili itai dulu okuungaunga nado. “Opolifi ohai i ashike novanhu ovo va dja koministili ngee ova pumbwa evatelo.
Ngee opu na eendjima dihapu, ohatu ke di taataya,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
