Ovakalimo vomoshitopolwahoololo shErongo ve li o60 ova manifa omadeulo ounafaalama woimeno noikwamavava koshi yopolohalama yomayambulepo eewino yepangelo.
Tai lalakanene elongo loikulya ya wana nokutota eemhito dokulimonena oiyemo.
Ovakufimbinga ova mona eedjapo davo koshivilo sha li koArandis Etivali sha ningwa kOministeli yEhongo, Omaduto, Ovanyasha, Omaudano, Omaunghulungu nOmifyuululwakalo okupitila moshikondo shehongo lovakulunhu.
Omadeulo ee li ombinga yOpolohalama yOpashiwana yEhongo lovakulunhu moshilongo nokwa li a yandjwa melongelokumwe nOministeli yOunamapya nOunaimuna, Omeva, Eeshi nOmatendululo Omadu.
Okwa li ya shoneka keewino doilonga younafaalama opo i vatele ovakufimbinga mokulonga oikulya, okutameka eengeshefa dishona nokumona oiyemo.
Omunambelewa wehongo lovakulunhu mErongo Michael Skini okwa ti ehongo lovakulunhu nomadeulo eewino natango aa fimana mokuninipika oluhepo nokutota eemhito moshiwana.
“Ehongo lovakulunhu neyambulepo leewino natango ola fimana unene mokuninipika oluhepo, okunghonopeka eliko, okutota eemhito doilonga nokuyambula po oshiwana,” osho a ti ngaho.
Skini okwa lombwela ovakufimbinga va longife ounongo neewino odo va mona va xwepopeke onghalo momaumbo avo, moshiwana nomaxupilo monakwiiwa.
Oministeli natango oya shiivifa kutya oya twala opolohalama yayo yehongo lovakulunnu koHimba pondje yoUis.
