Oshana osho kwa li sha etelela okano
Ombelewa yehongo moshitopolwahoololo shaKavango Uninginino oya didilika oningwanima yeehombo dounona ivali moule womido mbali da pita.
Shaxuuninwa osha ningwa neudo eshi vati omudali a kendabala okukufa okaana mofikola opo e ka hombolife po komulumenhu womukulunhu.
Omukulunhu wehongo Pontianus Musore, oo a holola oshinima eshi pefimbo leenghundaana dounona voumati koNkurenkuru Etitano, okwa ti meme wako nomulumenhu ova tulwa konima yekumba sha landula onghendabala ei.
Oshiningwanima eshi vati okwa li sha lopotelwa Musore komukulunhufikola, oo ita tumbulwa kedina opo kwaamenwe oukwatya wokaana.
Omadina ovadali nolokaana nao itaa tumbulwa.
Musore okwa lombwela oThe Namibian Omaandaxa kutya oiningwanima ikwao ivali okwa li vali ya lopotwa koNcuncuni nokoHalili odula ya dja ko naavo kwa li va kwatelwa moiningwanima omu ova mangwa po.
“Momudo 2024, okwa li sha lopotwa mofikola i li moshikandjohoololo shaMusese.
Inaku ifanwa opolifi, okwa li sha ungaungwa nasho komuxungimwenyo,” osho a ti ngaho.
Okwa ti luhapu eefikola ohadi pewa omauyelele kombinga yeehombo dounona nohadi pulwa di lopote oiningwanima ei kOministeli yEfikopamwe lOukashikekookanhu nOnghalonawa yOunona opo i katuke onghatu meendelelo, shaashi eehombo dounona oda ngudupikwa moimbuluma yopaukashikekookanhu.
Nande oiningwanima ei ohai lopotwa kominsteli meyukililo, Musore okwa ti oiningwanima ei inhe oya lopotwa tete kombelewa yaye keefikola manga inai tuminwa koministeli.
“Eehombo dounona oda kuma eefikola domodoolopa koNkurenkuru naado dokomikunda.
Ashike nee, medina leenghedi donhumba dopamufyuululwakalo, oiningwanima imwe ei ihai lopotwa,” osho a ti ngaho.
Okwa tumbula oluhepo, onghalo yomaxupilo tai shongola, ewiliko lovadali la nghundipala, omufyuululwakalo nomaumbo taa wilikwa kounona kutya oyo unene oinima tai fininike eefamili di ningi oinima ei.
“Ngee kapu na ovadali va wilike, va amene nokunyangela ounona, ounona vamwe ohava hepekwa kovalumenhu.
Moiningwanima ikwao, ounona ohava i kovalumenhu vakula opo va mone omayambidido, unene ngaa ngee ovadali vehe po, osho hashi pula ounona ve lipopile vene,” osho a ti ngaho.
Okwa ti kutya ombelewa yehongo oye lipyakidila tai tula kumwe omivalu domaumbo oo taa lelwa kounona opo i vatele mokuduta po omikalo deenghendabala odo di na okukufwa.
Omulandu ou li metifa, osho a ti ngaho.
Olopota yomomudo 2022 yomapekapeko a ningwa koministeli e na sha neehombo dounona aa holola kutya oshitopolwahoololo shaKavango Ushilo noKavango Uninginino oyo i li pombada meehombo dounona ya li peepelesenda 39.7, taku landula Kunene neepelesenda 24 omanga Oshana osho kwa li tashi kokolola okano neepelesenda 7.
Olopota oya ti eehombo nokwootekafana ohaku tameke pomido 11.
Ovaleli voitopolwahoololo moKavango itava popile oshinima eshi, tava londwele kutya otashi nyeke ounona voukadona omhito yehongo.
“Itatu twikile neehombo di li ngaha.
Oshinima eshi otashi nyeke okaana oufemba wako.
Itatu shi popile,” kamusela Thomas Ringi, woshikandjohoololo shaNcamagoro ta ti.
Rengi okwa pula oshiwana shiha popile “nandenande” eehombo dounona, ta londwele kutya ounona voukadona luhapu ohava di mo meefikola ndee tava ka kala ashike va tala muvakwao monakwiiwa.
“Inatu hala oshiwana shi na ovanhu va tala muvakwao shaashi ashike inashi tekulwa nawa,” osho a ti ngaho.
Kamusela woshikandjohoololo shaNcuncuni Michael Naiteta okwa ti eehombo dounona kadi li “paveta”. Okwa ti odi hadi unene mounona voukadona komikunda.
Naiteta okwa ti eefamili dimwe ohadi hombolifa po ounona vado opo di dule okuxupa pashimaliwa, ta weda po kutya ounona vamwe voukadona ohava nwefwa mo keenghalo davakwao.
Okwa indila ovaleli vopamufyuululwakalo va amene ounona voukadona ndee tava kwashilipaleke kutya inava longifwa okukandula po oluhepo loshimaliwa meefamili.
