Minista woundjolowele nomayakulo opanghalafano Esperance Luvindao okwa ti Namibia okwa pumbwa okukonga omikalo dokweeta oiyemo moshikondo shoundjolowele opo kuxwepopekwe ongushu yomayakulo oshiwana.
Luvindao edi okwe di popya pefimbo leenghundafana dovanambelewa vakula mOvenduka Etine.
Okwa ti omayakulo opaundjolowele inaa talika ko ashike kutya omayakulo opanghalafano ashike naa talike ko kutya oshikondo tashi dulu okuninga eebiliona dihapu.
“Oshikondo shomayakulo opaundjolowele oshikondo sheebiliona dihapu, eeno otu lile po okuyakula oshiwana.
Oshikondo shopanghalafano, ashike natango, ngee ohatu dulu okukonga omikalo dokuninga oshimaliwa shoshikondo osho tuu eshi, ohatu dulu okuxwepopeka meendelelo ongushu yomayakulo oo haa yandjwa keshe efiku kovakwashiwana moshikondo shepangelo,” Luvindao ta ti.
Okwa ti kutya eshi ovanambelewa vakula vepangelo tava longifa oipangelo yepangelo otashi vatele okuyukifa oimaliwa mokuyambula po oshikondo shepangelo shoundjolowele.
Presidente Netumbo Nandi-Ndaitwah, moshipopiwa sha yandjwa komukulunhuwiliki wOkomisi yOkuninga Omafaneko epangelo Kaira Mbuende, okwa ti oundjolowele nau fimanekwe moumbuwanhu waAfrica.
Presidente okwa ti oshitopolwa nashi nghonopeke oimaliwa youndjolowele, tashi wedele omayakulo opaundjolowele ndee tashi endelelifa okulonga omiti, eevenda, omashina noikwanoipangifo aishe yopaunamiti.
“Oinima ei inai yooloka. Aishe kumwe, otai eta po oshitopolwa shi li nawa nosha pama paundjolowele,” osho a ti ngaho.
Nandi-Ndaitwah okwa ti oshitopolwa nashi xulife po okuninga omaudaneko ndee tashi tameke okutula oinima moilonga, noinakuwanifa pomafimbo omondjila.
Okwa ti Okolona oya holola oupyakadi wokulikolelela mokulanda omiti, eevenda noikwanoipangifo yopaunamiti kondje.
“Ngee itatu yambula po ovapekapeki vetu, eelabolatoli, oipangelo, oikondo yomauyelele noiputudilo yokulihonga, ohatu kala ashike twe lineekela movanhu vokondje ngee tashi ya keewino, outeknika nomapotokonono oinima,” o
