‘Konima okwa pula ndi tule po oulya’
Ndokotola ta tamanekelwa ekwatongonga Dennis Noa, Etitatu okwa lombwela Omhangu yaMangestrata mOndangwa kutya okwa li a hala omulumenhu oo te mu tamanekele ekwatongonga a fiye po eumbo laye konima a nangala mo luvali.
Noa, oo ta ningi eindilo lobooloha, okwa ti okwa li a handukila naku mu tamaneka (26) shaashi vati okwa lya po oikulya yaye, mwa kwatelwa “osalami i na ondilo”.
“Okwa li nda hala a ye shaashi okwa mana mo osalami yange i na ondilo, ta mane mo oikulya yange noukunwa vange vokweeta eenghono. Okwa yeleka ofilindja yange,” Noa ta ti.
Okwa lombwela omhangu kutya nakutulamo oshipofa okwe mu talela po keumbo laye koshipangelo shaNandjokwe momafiku 27 Mei ndee ta kala mo fiyo omomafiku 29 Mei.
Noa natango okwa ti kutya okwa fiya nakutulamo oshipofa monduda yaye nopwa li oshikando shimwe e mu hanga ta teleke olwishi “linyenye” nomunghoka “wii” neenghono.
Kwa anya kutya omilele davo oda ningwa keenghono moule womafiku oo avali.
“Ina fininikwa a ye momilele,” osho a ti ngaho.
Noa okwa ti voo nanakutula mo oshipofa tete ova shakena momafiku 08 Mei, ndee tave li pe eenomola deengodi.
“Mongodi oha popyaapopya, ashike pakukala oku na eehoni kashona,” Noa ta ti.
Noa ota tamanekelwa okukwata keenghono omulumenhu momafiku 18 Juni.
Okwa ti ova ya momilele momafiku 17 Mei konima kwa li va nwa mo kashona ndee tava li mokaxuxwa ka kangwa.
“Okwa nwa eebiila mbali lwaapo omanga ame nda nwa ovodka,” osho a ti ngaho.
Noa okwa ti okwa pa nakutulamo oshipofa eepela dokukufa po oumbada.
Okwa ti konima nakutulamo oshipofa okwa tameka ta kungu.
Noa natango okwa ti okwa li tava tanguna konima nakutulamo oshipofa e mu pula e mu ningile ongeshefa yoteekisa ndele ta anye oku shi ninga.
“Okwa ti ngee inandi mu pa oshimaliwa ota patulula oshipofa shekwatongonga nokufutifa epangelo,” Noa ta ti.
Okwa ti okwa ka loloka ndee te mu tuku mwa kwatelwa noku mu pula ngee ota dulu ngaa okufila ounona vavali oshimwiyu “eshi e na oulumenhu ushona”.
“Okwa li handi kupula oikutu yaye pondje yeumbo lange,” Noa ta ti.
Noa okwa ti nakuningwa oshihakanwa ou ta popiwa okwa denga mo ekende londuda yaye nongonyo ndee te lilemaneke koshikesho ta kala ta di ohonde neenghono.
Okwa ti omulumenhu ote mu tamanekele ekwatongonga konima a (Noa) anya okuyandja oshimaliwa shi fike poN$35 000 shi lande oteekisa yongushu yoN$70 000.
Noa okwa li a mangwa po shi na sha vati nekwatongonga la ningilwa kofuleta yaye moshipangelo shepangelo muJuli.
Okwa li nale a tamanekelwa oshipofa sha faafana naashi vati a kwata keenghono omunaudu (18) moshipangelo shaKatutura mOvenduka, ashike kakwa li a monika ondjo.
Eindilo laye lobooloha okwa li la twikila onghela.
