Elelo lodoolopa yaWindhoek ola kufa eenghatu dokuungaunga nounona ovo ve lihanene oshilando tava ehela nokulandifa oinima pomindilo domopate.
Eshi osha landula eenghundafana da etwa kukamusela Ignatus Semba pefimbo loshoongalele shewiliko lodoolopa Etine.
Semba okwa holola omalimbililo kombinga younona tava tengenekelwa po150, taku tiwa ova dja koAngola, ovo luhapu tava monika pomashakeneno eendjila a kula tava landifa omaluko needibo manga yo tava indile oimaliwa kovalongifi veepate.
“Ounona vamwe otaku tiwa ove na omido di li pokati kanhano naheyali, osho she va tula moshiponga shomahauto meepate omo hamu kala mu hadi neenghono,” osho a ti ngaho.
Semba okwa londwela kutya onghalo inai tula ashike eameno lounona moshiponga ashike oya nyika yo oshiponga kovalongifi veepate, manga yo ta pula eenghendabala defimbo lile dokuxwepopeka onghalo ei.
Okwa indila onghatu yopashiwana kukandulwe po oshikumungu eshi, ndee ta indile epangelo li konge omanyamukulo taa amene onghalonawa younona nokuyambula po eameno loshiwana.
Ongombinga yeenghundafana, Semba okwa ti ewilikongudu ola tokola opo ombelewa yamayola i kundafane nomahangano omondjila epangelo novakufimbinga vakwao va ninge eenghendabala odo tadi shiva.
Oshikumungu osha yukifwa kokomitiye yewiliko opo shi ka talululwe nokuningwe omapopilo manga ewilikongudu inali kufa etokolo laxuuninwa.
