Komufala wopolifi moshitopolwahoololo shaShana, Naftal Sakaria okwa londwela kutya omahepeko ounona opamilele komalungula otaa ningi ahapu, ta ti oshinima eshi otashi kumwifa nokweehameka oonakuningwa oihakanwa.
Oshinima eshi Sakaria okwe shi popya pepatululo lopambelewa lomadeulo eyandjo louyelele kombinga yokwaamena ounona nomaukwatya oonakuningwa oihakanwa Omaandaxa kOshakati.
“Eyokomesho lomahepeko ounona komalungula noimbuluma ikwao i lili otai kumwifa neenghono.
Oimbuluma ei ohai fiye oonakuningwa oihakanwa ve li momikundu da yooloka dopamadilaadilo, pamaliudo nosho yo panghalafano,” osho a ti ngaho.
Okwa yeleka kutya opolifi kai na ashike oshinakuwanifa shokunghonopeka oveta ashike oi na yoo oshinakuwanifa shokukwashilipaleka kutya oonakuningwa oihakanwa ova amenwa novayambididwa nawa okupitila moshikondo shouyuki.
Omadeulo, oo a tameka Omaandaxa taa i fiyo Etitano, ee ta pamwe ovakufimbinga okudja koshikondo shokunghonopeka oveta nomayakulo opanghalafano kunghonopekwe omanyamukulo oipofa ya kwatela mo omahepeko opamilele ounona komalungula nomahepeko opaukakwashikekookanhu, oimbuluma tai ningilwa ounona nomandjondjo ovanhu.
“Omadeulo ee ya pefimbo liwa nola fimana. Ongovakufimbinga moshikondo shouyuki, onye mu li komesho yokulwifa oshinima eshi,” Sakaria ta ti.
Okwa weda po kutya oipofa ei oya pumbwa okuungaungwa nayo nawa, unene ngaa oumbangi wopamalungula.
“Oilonga yeni mokwaamena oonakuningwa oihakanwa nokuungaunga nawa noumbangi wopamalungula otaku dulu okuninga eyooloko pokati ketamaneko liwa nomhito ya palwifwa youyuki,” Sakaria ta ti.
Okwa yeleka efimano lelongelokumwe mokuungaunga noimbuluma ei.
