Komufala wopolifi koshitopolwahoololo shaZambezi Julia Sakuwa-Neo okwa indila opo ehandukilo lokushinga omunhu e li koshi yodungo li wedelwa fiyo opoN$8 000.
Eshi osha landula eyopombada loipofa yovanhu tava shingi ve li koshi yodungo noiponga yomeendjila ya hapupala.
Edi okwe di popya pefimbo leenghundafana nokomitiye yopaliamente i na sha noipambele yoyeendifo, omatungo nomaumbo.
Okomitiye, tai kwatelwa komesho kuGoerge Garab otai lalakanene okumona omadilaadilo ovanawino nomilandu odo di na okukufwa opo kuninipikwe oiponga yomeendjila.
Sakuwa-Neo okwa ti okushinga ovanhu ve li koshi yodungo moshitopolwahoololo okwa kala nokuya pombada novashingi ve li 93 ova mangwa po nale momudo woshimaliwa 2026/27.
Moule wefimbo olo tuu eli momudo woshimaliwa wa pita, ovashingi ve li 26 okwa li va mangwa po, osho tashi ulike eyopombada neenghono, osho a ti ngaho.
“Kandi shii kutya ohatu wedele ngahelipi ehandukilo lokushinga u li koshi yodungo, shaashi ovashingi kave wete po sha poN$4 000 . . .
“Ope na efimbo limwe la li oN$8 000, ndee mutu eshi otashi va tilifa.
Ondi wete kutya ovanhu vamwe kave na oupyakadi woshimaliwa, nande osha wedelwa, otashi dulika natango va nwe ndee tava ka shinga, futa oN$8 000 ndee to efwa,” sho a ti ngaho.
Sakuwa-Neo okwa pula opo ovo tava twikile nokushinga ve li koshi yodungo omikanda ve di kufwe.
Eepate nado nadi wedelwe opo di kale da kula nokulongifwa nawa, ta ti.
“Opwa pumbwa yo okuyandjwa oinima ngaashi oyeendifo noikwanoipangifo kunghonopekwe oshikondo osho hashi ungaaunga neepate moshitopolwahoololo. Eengeshefa domalodu nadi kale kokule neefikola noneepate doshiwana opo kuninipikwe omafyo ovaendi vokolupadi,” osho a ti ngaho.
Sakuwa-Neo natango okwa holola kutya okwa li kwa lopotwa oiponga yeetuwa i li 472, mwa kwatelwa ovanhu ve li 39 va lemana nomafyo e li 18 momudo woshimaliwa 2025/26.
Momudo woshimaliwa 2026/27, okwa lopotwa oiponga yomatuwa i li 98, mwa kwatelwa ovanhu ve li 13 va lemana unene, osho a ti ngaho.
“Oiponga ei okwa li ya etwa komalola a topa, ovashingi va nyengwa komahauto, omahauto e li denga mumwe omitwe noimuna i li mopate,” osho a ti ngaho.
Okwa ti eenghendabala ngaashi okutula ovanambelewa vopolifi mopate, okutula mo omainda nomahongo kombinga yeameno lomeepate moshitopolwahoololo oda tulwa moilonga kukelelwe oiponga.
