Opolifi moshitopolwahoololo shaZambezi otai kongo omulumenhu (44) shi na sha vati nedipayo lomukulukadi waye koKatima Mulilo Oshoondaxa.
Nakufya oye Rachel Simasiku (33), ovakwapata vaye ova shiivifilwa nale.
Omupopiliko wopolifi moshitopolwahoololo inspekta Kisco Sitali okwa koleka oshiningwanima osho sha ningwa lwopotundi 21h00 molukanda ledina Choto koThe Namibian Omaandaxa.
Okwa ti ovanhu ava vavali okwa li va udika tava tanguna kovashiinda, konima Simasiku okwa ka tameka ta pula evatelo.
“Ovashiinda, eshi va uda eenghuwo, ova ya keumbo lavo ve ke mu vatele, ashike eumbo okwa li la patwa.
Ova talela nee mekende ndee tava mono omufeekelwa e kwete ombele. Okwa dima mo monduda.
Konima yokafimbo Simasiku okwa mwena ndee omufeekelwa ta di mo meumbo e na ombele.
Okwa lombwela nee ovashiinda va dengele opolifi shaashi okwa mana okulonga osho kwa li ta longo,” osho a ti ngaho.
Sitali okwa ti, ovashiinda ova endelela va ye meumbo ndee tava hange Simasiku ehe na omwenyo e li koshi yohonde.
Okwa weda po kutya ova dengela opolifi ndee tava endelele ve mu twale koshipangelo.
“Ashike ne, Simasiku okwa li a monika kutya ke na omwenyo eshi a fika koshipangelo.
Olutu lanakufya okwa li la konakonwa, ndee tali monika kutya oli na oipute ihapu moshipala nokomutwe,” osho a ti ngaho.
Okwa weda po kutya opolifi oya hanga po ekuva li na ohonde neexwiki domunhu, nosho yo ongodi yanakufya oyo kwa li ya tatulwa po.
Sitali okwa weda po kutya otava kongo omufeekelwa oo a dja koGrootfontein, ndee keshe oo e na ouyelele kombinga yaa pa e li, na dengele oshitaashi shopolifi shi li popepi.
