Minista wOuyuki nOipambele yOilonga Fillemon Immanuel okwa pula kuningwe eenghundafana dopanghalafano da pama notadi twikile pokati kovayandji voilonga vepangelo novanailonga.
Oministeli momukanda wokoikundaneki Omaandaxa oya ti Immanuel edi okwe di popya pefimbo leenghundafana nehangano lovanailonga ledina Mineworkers Union of Namibia (MUN) kOranjemund mexuliloshivike.
Okwa ti oilonga i li melandulafano ohai dana onghandangala ya fimana mokutula po omilandu nomatokolo a pamba ovanailonga noshikondo shoilonga, ta popi kutya omanyenyeto ovanailonga naa kale a kwatelwa momilandu deenhele doilonga, meeveta, momafaneko nomikalo odo oinima tai ningwa.
Minista okwa indila ovakufimbinga moipambele yopanghalafano va xulife po okulikalela ndee tava longifa eenghundafana dopanghalafano nawa va kandule po oikumungu ya kuma ovanhu eembinga adishe.
Okwa ti eenghundafana dopanghalafano nadi fimanekwe manga ovanhu inava tameka okupata omivelo, okuninga omakangha nomahololomadilaadilo ongomukalo wokuholola kutya inava panda osho tashi ningwa meenhele doilonga.
“Inatu ninga ashike eenghundafana dopanghalafano ngee pu na eenamanana dopailonga, ashike natu xwaxwameke omukalo wokukundafana wa manguluka, hatu tofa mo omikundu ndee hatu longele kumwe moku di potokonona,” Immanuel ta ti.
Okwa twa yo vali elelo lehangano omukumo opo li kwatele mo ovakufimbinga vakwao meenghundafana tadi shikula opo va tofe mo omikalo dokupotokonona omikundu da kwatela mo aveshe ngee tashi ya kokuungaunga nomikundu dopailonga.
Immanuel okwa ti elongelokumwe neenghundafana dopanghalafano natango oi li oinima ya fimana momakwatafano awa opailonga, ta weda po kutya eenghundafana diwa otadi dulu okuvatela mokuungaunga nomikundu dopailonga manga inadi ninga eenamanana.
Okwa indila yo omahangano ovanailonga a kale a nuka po mokukundafana eenghalo doilonga di li xwepo nokulongifa eeveta dopafinamhango odo di li po.
Minista okwa londwela kutya outeknika upe, mwa kwatelwa omaungoba a yooloka, otaa lundulula onakwiiwa yoilonga.
Onghee nee okwa indila omahangano ovanailonga novayandji voilonga va fimaneke eyandjo leewino va longekidile ovanailonga eemhito nomikundu da kwatakanifwa neyopombada loungoba.
Natango, Immanuel okwa pula Ovanamibia va kale tava mono omauwa eedjo doshilongo nokukufa yo ombinga meliko.
Okwa ti ekufombinga liwa loshiwana nali ete eemhito doilonga, eyambukepo loikwafaabulika, enenepeko leengeshefa nonghalo yomaxupilo i li xwepo, ponhele ashike li fatululwe nomadina noinima ya pamba oumwene womoshilongo.
