Uuministili wIilonga nIiyenditho owa tseyitha kutya epangelo otali ke eta po oveta nomilandu dhokuwilika oosikola dhokwiilonga okuhinga osho wo aalongi yokuhinga, naandhoka odha popiwa kuminista Veikko Nekundi.
Pethimbo lyoshigongiilonga shaakuthimbinga yomoshikondo shaalongi yokuhinga iihauto moSwakopo, Nekundi okwa popi kutya epangelo olya tokola opo oshikondo shoka shi kondololwe paveta nelalakano lyokuhwepopeka ongushu momadheulo gokwiilonga okuhinga naashoka otashi ka kwathela wo nokunkondopeka egameno lyomoopate.
Okwa gwedhapo kutya oshikondo shokulonga aantu okuhinga osha taalelwa komashongo ogendji ga kwatelamo omadheulo kaageli pandondo, omaipulo kombinga yaalongi yamwe mboka inaaya pyokoka, iihauto tayi longithwa kaayi li pankatu yokudheula osho wo omapuko galwe.
“Egameno lyomoondjila ohali tameke nale omanga omuntu keena omukanda gwokuhinga,”osho Nekundi a popi ngaaka.
Okwa popi kutya oosikola dhokulonga aantu okuhinga ohadhi dhana onkandangala ya simana mokuupika omikalo dhaahingi yiihauto aape.
Oshigongiilonga shoka osha ningwa opo epangelo lyu uve wo omanyenyeto, omashongo osho wo omayele okuza kwaamboka haya longo aantu okuhinga opo shi kwathele mokweetapo omulanduwiliki tagu opalele.
Minista okwa popi kutya omutungilothaneko ngoka gu li po otagu ka longithwa okushangitha pamulandu oosikola dhokulonga aantu okuhinga, okushilipaleka kutya aalongi yokuhinga oya pyokoka noyena ontseyo, okushilipaleka kutya iihauto tayi longithwa oyina egameno lyokudheula aantu osho wo okweetapo omulandu gu li pondondo yimwe moshilongo gwokudheula aailongi yokuhinga.
Nekundi okwa londodha wo kutya oosikola dhokwiilonga okuhinga inadhi kala owala dha tala ko okwiilonga okuhinga ongongeshefa yokweeta omboloto poshitaafula.
“Itatu vulu okwiidhimbika egameno lyoshigwana medhina lyongeshefa yokwiimonena shomondjato,”osho a popi ngaaka.
Okwiindile aakuthimbinga ya gandje omagwedhelopo gawo gi ikwatela kwaashoka shi li komutunda opo ga kwathele mokutunga po omilandu ndhoka tadhi opalele, nokwa popi kutya elalakano enene lyokweeta omilandu moshikondo shikwiilonga okuhinga okuhupitha oomwenyo moopate dhaNamibia.
“Ino kala nande omuunganeki melanditho lyomikanda dhokuhinga,” osho Nekundi a londodha ngaaka.
