Oonakutembudhwa momagumbo geni takamitheni omayako

MBOKA mwa li mwa tembudhwa momagumbo geni omolu omeya gefundja, ta kamitheni omayoka sho tamu shuna ko ishewe komagumbo geni, oshoka nani otashi vulika mwa ya omayoka manga mwa li kOosenda hoka mwa li mwa tembudhilwa.

Shika oshe ya puuyelele sho omukalimo gwomOlukanda lwa Shoopala mOshakati tate Levi Stefanus, ngoka a li a tembuka megumbo lye omolu omeya nokuya kOsenda ya Shoopala, a adha megumbo lye mu na eyoka enene lyelyadhila, nenge ontoka walye, sho a galukile mo komatango gEtitatu lyoshiwike sha zi ko. mEtitatu moka, tate Stefanus naanegumbo lye, oya tokola okuza ko kootenda dha Shoopala nEkuku ya galukile kegumbo lyawo molukanda lwa Shoopala molwashoka omeya ngoka ga li ge ya kutha mo megumbo, ga pwinina.
Sho ngaa ye ya lwopegumbo mpoka, okamatyona kawo koomvula hamano lwaampoka kedhina Petrus Stefanus, hoka ka li ka nyanyukwa sho taya shuna kegumbo lyawo okuza koothaila kOsenda ya Shoopala, oka matuka ke li komeho nokuya mo megumbo tango.
Sho ngaa kayi mo ngayo, okiitsu moshinima oshileeleka tashi ipwedha megumbo lyawo moka, nokazi mo taka matuka, taka lombwel tate gwako Levi kutya megumbo omu na ohi ondeendeka.
Levi okwa kutha ondhimbo ye nokwa yi mo, a tale oshinima kashi shi ohi, eyoka nani. Okwa kutha ondhimbo ye noku li dhenga meendeledlo komutse iikando oyindji nawa nolya si. Te li kutha mo noku li eta puuyelele mpoka aashiinda naayehe ya li mpoka ya mbombolokele mpoka yee ya tale eyoka ndyoka enene neleeleka noonkondo. Taku tiwa kutya oli na oometa ndatu lwaampoka. Yamwe oya kala taya ti kutya elyadhila, omanga yamwe ya kala taya ti kutya ontoka. Kapwa li naanaa ngoka e shi kutya eyoka ndyoka ekwashike na tate Levi okwa tokola a ithane Opolisi yi li fale kwaamboka yegameno lyiilikama nomakuti ya ka tale kutya eyoka ndyoka ekwashike naanaa.
Inatu uva natango kutya ekwashike, na opo ngaa tatu ka pulaapula kOpolisi kutya eyoka ndyoka ekwashike naanaa.Aakalimo yomOshoopala, otaya indile kElelo lya Shakati li kale hali konaakona mo tango momagumbo gaakalimo mboka ya li ya tembudhwa mo omolu omeya gefundja, manga inaya galukila mo, oshoka nani otashi vulika mu kale mu na omayoka n osho tuu.