Epangelo oli li moshipyu eshi la tota onotwaveta yomangudumano oshiwana.
Eshi oshe ya konima ominista yoikwameni, omatembu neameno Albert Kawana kwa li ya twala onotwaveta ei komutumba wopashiwana Etitatu loshivike sha dja ko.
Onotwaveta otai lalakanene okuwilika omangudumano oshiwana.
Onotwaveta oya indika omahololo omadilaadilo oshiwana peenhele dimwe ngaashi peemhangu, peembelewa doilongo, popaliamente, peumbo lepangelo, poupale veedila nosho yo pomatungu amwe haa longifwa ongeembelewa dovakalelipo voilongo, pomatungu etanga leameno, peedolongo domavyulonghalo.
Onotwaveta otai lalakanene okuwilika omangudumano oshiwana eshi tai pula opo ovalongekidi vomangudumano atya ngaha va kale hava kongo epitikilo tete, tashi ulike eenghono dopolifi pefimbo loitufi oyo notashi indike keshe umwe aha umbate oilwifo poitufi oyo.
Ngee omunhu okwa dopa okulandula omalombwelo ota ka pewa ehandukilo loshimaliwa shi fike poN$5 000 ile a ye modolongo oule wefimbo inali koyelela podula imwe. Omunashipundi wokomitiye yedina Katutura Residents Committee Shaun Gariseb okwa ti onotwaveta otai fininike notai shunifa monima.
“Osho tashi pulwa konotwaveta oyo pefimbo lomahoololo otashi fininike oufemba wetu ngaashi wa popiwa mokatendo okatitatu kekotamhango,” Osho a ti ngaho.
Gariseb okwa ti okwiindika ovanhu va ngudumane ndee tava holola omadilaadilo kombinga yoinima ya pamba onghalafano nomaxupilo omukalo tau shunifa monima. “Otashi limbililike nokashi li nawa kutya, eshi ongudu tai pangele i na omawi ahapu, otashi dulika u kale oove wa kumwa komakulunguto aa, osho shi li oukwatya wii,” Osho a ti ngaho.
Okwa pula ngee ongudu tai pangele otai kendabala okulikaleka kokule nomakulunguto oo a yukifwa kuyo.
“Eengudu domilameno noilyo yoSwapo oyo ya penduka inai pitika oshinima eshi ndee otu na okuholola omakulunguto etu muSeptemba opo tu kelele onotwaveta ei iha ye komesho,” Osho a ti ngaho.
Omupopiliko wopashiwana wongudu yoAffirmative Repositioning George Kambala okwa ti onotwaveta otai lalakanene okwiindika nokuwilika omalinyengo ovanhu. “Osho tashi pulwa otashi shunifa monima nokashi shi shopamufika waNamibia, shaashi otashi yandje unene eenghono dihapu kukomufalandjai nominista, tashi va pe oufemba wokukoleka ile vaha koleke omangudumano, osho shi li sha lyatela pedu oufemba wekotamhango wokungudumana nemanguluko,” Osho a ti ngaho.
Kambala okwa ti onotwaveta otai imbi ovanadolongo, ovanailonga vomoipangelo nosho yoo oomagestrata va ngudumane va kundafane eudo lonai lavo.
“Otu udite ko kutya epangelo lopaife ola kala le lipyakidila tali tula omilandu moilonga, omilandu doilongo yokuuninginino nosho yo oinima yokuwilika omalinyengo ovanhu ndee otashi limbilike kutya otwa yuka naana peni,” Osho a ti ngaho.
Kambala okwa ti epangelo nali tule onotwaveta ei momishangwa dondjokonona, “omo inai pumbwa nokudja mo nokuli.”
“Otashi piyaaneke nai eshi Kawana ta yambidida oshinima eshi, unene ngaa okutala kutya ovakondjeli manguluko ngaashi yee, ovo kwa li va indikwa neenghono unene pefimbo lokatongotongo, okwa fa a dimbwa emono loixuna lavo konakudiwa,” Kambala osho a ti ngaho.
“Eengudu domilameno odo di li mopaliamente nadi lwife neenghono onotwaveta ei, shaashi otai holola okwiihole kwoilyo yopaliamente yoSwapo, mwa kwatelwa novanyasha, ovo kwa li va pumbwa okuyandja omaliudo avo e li ominge petameko ndee tava shiivifile oshiwana. Otashi udifa nai eshi va mwena ashike,” Osho a ti ngaho.
Haende Mbanga Siyomunji wokehangano lovakalelipo vopaveta ledina Siyomunji Law Chambers okwa ti onotwaveta itai kala i li pakotamhango.
“Oufemba wokuholola omadilaadilo oufemba wokuninga ominyanyo. Oto holola eudo lonai kombinga yoshinima shonumba,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
