Onkumwe yaakwashigwana kegandjo lyoboloha komufekelwa ngoka a yaha omusita

Aakalimo yomomukunda Onambaba moshitopolwa shaHangwena inaya nyanyukilwa etokolo lyompangu sho ya gandja oboloha komukulupe gwomimvo 63 ngoka ta fekelwa oshiningwanima sheyaho lyomusita nondjembo.

Oshiningwanima shoka otaku hokololwa sha ningwa ongulohi yomasiku 5 Desemba pegumbo lyomusita Lukas Mokaxwa, ngoka a hupu sho a yahwa nokweehamekwa mepepe.

Okwa hokolola kutya oshiningwanima shoka osha ningwa konima sho a galukile kegumbo lye lyomiti opamwe naanegumbo okuza kokapale komaudhano hoka kwa li oshiindingili shomaudhano.

“Omvula oya tameke okuloka, nonda tokola opamwe nomukulukadhi gwandje osho wo omuyambidhidhi gwandje tu fale iinima yimwe kegumbo.

Mokuthika, otwa yapukilwa koshihauto peyelo lyegumbo.

Omukwashigwana gwedhina Frans Makanda okwa zi mo moshihauto shoka ta pula ohondakadhona ye, ndjoka a popi kutya oyi li megumbo lyandje,” osho Mokaxwa a hokolola ngaaka.

Omusita okwa gwedhapo wokutya Makanda okuna okanona nomuyambidhidhi, Cecilia Petrus (40), ashike kaye li we mekwatathano lyopaihole molwashoka Makanda okwa hokana nale omimvo dha zi ko.

“Makanda okwa shuna koshihauto she nonde mu landulile ko noku mu lombwela e shi kuthe mo mondjila.

Okuza mpoka ondu uvu ondjembo ya topa nonda dhimbulula kutya onda yahwa mepepe,” osho Mokaxwa a popi ngaaka.

Okuza mpoka Makanda otaku hokololwa e ya megumbo lyomusita nolwanima omulumentu gumwe okwe ya po noku mu yuga ondjembo, naashoka oshe eta omufekelwa ngoka (Makanda) a fudhukepo.

Otaku hokololwa kutya okuza mpoka Makanda okwayi koshitaasi shopolisi yaMungwelume nokwa gandja oshimaliwa shooN$3 000 kaapolisi mboka ya li miilonga nokwe ya lombwele ya ka tale ko “omudhimba” gwaMokaxwa kegumbo lye.

Ashike sho opolisi ya yi kegumbo lyaMokaxwa oye mu adha nomwenyo noye mu fala koshipangelo a ka mone uuhaku.

Makanda okwa tulwa miipandeko esiku olyo tuu ndyoka nokwa patululilwa oshipotha shonkambadhala yedhipago.

Okwa mangululwa mo mondjeedhililo sho a pewa oboloha yooN$1 500 mOmaandaha.

Mokaxwa okwa nyana noonkondo etokolo lya ningwa kompangu okugandja oboloha kuMakanda.
“Kashili mondjila opo omuntu a yahe ndje nokupewa oboloha.

Oshinima shoka osha pumbwa okutaliwa ko nawa.

Ando ongame nde mu ningile oshiningwanima shono, ando oboloha onde yi pewa ngaa? Aaye shoka kashili mondjila,” osho a popi ngaaka.

Aakwashigwana nayo oya zi mokalungu nokupopya kutya ngashingeyi oya tala ko Makanda ongomuntu a nika oshiponga mokati koshigwana.

“Otwa tila okukala momudhingoloko molwashoka ngashingeyi omulumentu ngoka okuwete ihaa ningwa sha.

Opolisi osho wo ompangu inayi ninga nawa nande sho ye mu pe oboloha.

Ondjembo ye natango onkene e yi na nonkene ta tsikile nokuningila aaantu omatilitho,” osho aakwashigwana ya popi ngaaka.

Sho a kwatathanwa naye, Makanda okwa zimine kutya okwa yaha omusita nokwa popi kutya ku uvite nande ondjo yasha.

“Ngono keshi omusita; ndyoka embungu lye ya okulala naakiintu.

Onde mu yaha molwashoka okwa li ta lala nomukiintu ngoka ndi na naye okanona.

Ethandje nokuli ngame ondina iilonga yandje yilwe mbyoka tandi longo momukunda muka,” osho a lombwele onzonkundaneki ndjika ngaaka.

Omukwatakanithi gwomakonakono giimbuluma moshitopolwa shaHangwena, omupevikomufala Mamsy Mburu okwa koleke kutya omufekelwa okwa patululilwa oshipotha shonkambadhala yedhipago.

“Oshipotha shoka oshi li mompangu, niinima ayihe yi na sha negandjo lyoboloha osho wo iihokolola oyi li momake goveta,” osho Mburu a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.