Ovanhu ve dulife po2 000 ove lishangifa kehangano ledina Yambuka Housing, ehangano lipe tali lalakanene okutunga omaumbo omaboolota mOvenduka.
Oshiwana okwa li sha shivwa shi lishangife ngee osha hala okulanda omaumbo aa pepatululo lao koXamro Cultural Centre mOvenduka Olomakaya.
“Otwa kala po fiyo opo nhee yokomatango shaashi omikweyo okwa li dile.
Pexulilo lefiku, ovanhu ve dulife po2 000 ova holola ohokwe momaumbo aYambuka,” omukulunhuwiliki waYambuka Twapewa Kadhikwa osho a ti ngaho momukanda wokoikundaneki Oshoondaxa.
Ehangano otali ka yandja omaumbo avali a yooloka: Limwe otali ifanwa Iyaalo li na onduda imwe yokunangala nokandjuwo.
Likwao otali ifanwa Shavena, li na eenduda mbali dokunangala, nokandjuwo nokombifa i li mumwe nosheti.
“Elalakano letu olipu: okukufa eefamili meebashu di ye momaumbo aYambuka, ndee nena otwa mona lela nghee twa pumbwa okweendelela,” Kadhikwa ta ti.
Oshilyo shopaliamente George Kambala koshivilo oku okwa ti okuyandja omaumbo omukalo wokuyandja ouyuki nota yambidida eepolohalama adishe odo tadi yandje omaumbo opamufika keefamili.
“Eumbo lomaboolota otali dulu okukala loshinanena komunhu, ashike kofamili oyo nghee ya dalelwe i kale i na eumbo layo vene, kashi shisha ashike etameko ashike,” osho a ti ngaho.
Eumbo e li tali ka kala li na ombilixa oli na N$99 950.
Ehangano ola ti otali toto po omukalo wokufuta uwa opo li yambidide ovanhu va lande omaumbo avo.
“Omaumbo kee shi oshikondo. Omaumbo omukalo wouyuki, omanga ohiila oyo tu li muyo nena omukalo uhe na ouyuki itau lididimikilwa vali,” Kambala ta ti.
