Ombelewa yaPresidente oya ti ongudu yovanangeshefa ve dulife po200 oyo ya enda pamwe napresidente Netumbo Nandi-Ndaitwah okuya koChina itai longifa nande oimaliwa yepangelo.
Ouyelele ou owa landula omanyenyeto oshiwana konima yeelopota odo da popya omwaalu wovanhu ovo va ya napresidente.
Momukanda wa pitifwa Omaandaxa, Eumbo lEpangelo ola ti ongudu yovanangeshefa okwa li ya unganekwa kehangano olo li na sha nomaxwaxwameko nomayambulepo eengeshefa ledina Namibia Investment Promotion and Development Board okupitila momaindilo, a pitika omahangano a kufe ombinga molweendo li na sha nongeshefa la endela pamwe netalelepo lopapangelo.
Oya ti eengeshefa odo tadi kufa ombinga odi li moChina paife oshivike eshi tadi kongo eemhito deengeshefa, tadi toto omalongelokumwe, tadi kongo omahangano oko tadi dulu okukala tadi lande oinima yado nokukonga yo opo tadi dulu okukala tadi landifa nokuyandja omayakulo okudja moshilongo.
“Eengeshefa odo tadi kufa ombinga oda ninga omalongekido ado vene olweendo nokukufa ombinga,” Ombelewa yaPresidente tai ti.
Ombelewa yaPresidente oya ti omwaalu uhapu wovanangeshefa tava kufa ombinga owa holola ohokwe yoshikondo shopaumwe yokukufa ombinga meemhito odo da yandjwa koshilongo osho shi li poutivali mounyuni moilongo oyo i na eliko li li pombada.
Oya ti kutya omahangano itaa dulu okulongifa oimaliwa poima ehe wete po ouwa wongeshefa neyokomesho laalushe.
Natango Ombelewa yaPresidente oya ti oshinima eshi ohashi ningwa mounyuni, ovaleli veengeshefa tava ende pamwe nomitwe doilongo metalelepo lopambelewa kuxwaxwamekwe oipindi neengeshefa.
Oya weda po kutya omalweedo a tya ngaho ohaa nghonopeke omakwatafano opaliko, manga yo taa yambidida oikwafaabulika, etoto loilonga nokuwedela eemhito dokungeshefa.
