Omunashipundi wEwilikongudu lElelo lOpamufyuulukwalako lOndonga John Walenga okwa ti oshipwe omukainhua aye kekango lomongwa mOndonga.
Ekango, li li moshikandjohoololo shaMuntele moshitopolwahoololo shaNdonga ola eta omalipulo konima omukainhu wokamusela a dja koshitopolwahoololo shaKhomas kwa li e li talela po pefimbo lopolohalama yokupaafana ouyelele ya kwatela mo eekamusela okudja moKhomas nOshikoto.
Okavido taka ulike kamusela e na ekuma lomongwa la dja mekango omo okwa li ka tulwa komalungula.
“Kufye mOndonga oshipwe omukainhu a talele po ekango lomongwa.
Oshipwe, ngaashi ashike omulumenhu ina pitikwa a telekele pomafiya,” Walenga osho a lombwela oThe Namibian ngaho.
Omapopyo aWalenga ee ya konima a lombwela oshivilo shopamufyuululwakalo omwedi wa dja ko kutya Elelo lOpamufyuululwakalo lOndonga otali katukile onghatu eekamusela domOshikoto odo vati da twala omunailonga pamwe nado a dja koKhomas kekango lomongwa, oko vati va kufa omongwa inava pewa epitikilo kovaleli vopamufyuululwakalo.
Ongudu ei vati okwa li ya kwatela mo eekamusela da yooloka.
Walenga oshikumungu eshi okwe shi eta po pefimbo lomutumba welelo noovene vomikunda wa ningwa omafiku aa, ta pula kutya eekamusela doshitopolwahoololo oda hanga epitikilo peni lokutwala ovatalelipo konhele oyo i li koshi yewiliko lovaleli vopamufyuululwakalo puhe na ediminino.
“Eekamusela odo oda kalela po lyelye? Eekamusela odo da twala ko ovanhu ovo va dja kokulekule, va dja keedoolopa,” Walenga ta ti.
Okwa pula kutya omolwashike ovatalelipo va pitikwa va kufe omongwa inava pewa epitikilo kelelo lopamufyuululwakalo.
“Omukainhu oo twa mona komalungula ina dja mOwambo. Eekamusela dokoKhomas vati okwa li de ya okutalela po dikwao mOshikoto, ndee onguduwiliki yoshitopolwahoolo shaShikoto tai va twala kekango lomongwa ndee ova ka kufa nomongwa nokuli,” osho a ti ngaho.
Kamusela woshikandjohoololo shaSamora Machel, Lydia Kanime okwa ti ke shii kutya Walenga olyelye nokakwa li ta dulu okutya ko sha koshikumungu eshi.
“Ngee Walenga okwa hala okuunda kwaame na dengele nge ndee handi mu tumine kwaau e na oshinakuwanifa a tye sha kombinga yoshinima eshi,” osho a ti ngaho.
Walenga okwa ti eekamusela da hoololwa oda teelelwa di kale da fimaneka elelo lopamufyuululwakalo lOndonga.
“Eekamusela! Kapu na elelo mOndonga li dule lohamba yaNdonga.
Otashi holola kutya opu na epuko ngee eekamusela oda tokola okupita omufyuululwakalo pomunghulo ndee tadi twala ovanhu kekango lomongwa,” osho a ti ngaho.
Omunashipundi okwa ti ohamba oya yandja elombwelo kelelo lopamufyuulukwalo li tale nawa oshinima eshi ndee tali katuka onghatu.
“Ohamba oya lombwela nge kutya owa handuka, oshi li mondjila, ino puka.
Ohamba oya ti nandi shi konakone. Otwa pewa oufemba oo. Elombwelo lohamba itali hepa.
Otu na okukufa onghatu,” Walenga ta ti.
Oshinima eshi paife osha eta nee omalipulo ngee oupyakadi osheshi eekamusela da kufa omongwa inadi pewa epitikilo ile osheshi omukainhu a ya konhele oko ihaku i ovakainhu.
‘KASHI LI PAFINAMHANGO’
Omukulunhuwiliki wehangano ledina NamRights Phil ya Nangoloh okwa ti kutya oshinima eshi osha nyika outondwe ndee ta ti oinima yopamufyuululwakalo itai dulu okupitilila oufemba wefinamhango.
“Fyee koNamRights ohatu kelele oveta ei yopamufyuululwakalo wOndonga oyo tai kelele ovakainhu va lyate kekango lomongwa moshilongo,” osho a ti ngaho.
