OMVULA onene ndjoka ya li ya loko pomahala ogendji moshilongo oyali ya taambiwa ko ku yamwe ongomayambeko omanga kuyamwe oya li ya yonagula nokwe eta nokuli omaluhodhi.
Omaso ge li 12 okwa li ga lopotwa kopolisi mehuliloshiwike lya zi ko sha landula omvula onene ndjoka ya li ya loko. Omaso ngoka ogendji oga li unene ga lopotwa konooli yoshilongo, okwi ikwatelela kolopota yiimbuluma yopolisi yokoshiwike ndjoka ya li ya pitithwa mOmaandaha.
Olutu lwa Julia Junias (6), ngoka a li a lopotwa a kana konima sho a li inaa thika ko kegumbo okuza kosikola, okwa li lwaadhika mekango li li popepi negumbo lyaandjawo momukunda Oyongo mEtitano lwopontano yokomatango.
Okwa lopotwa kutya oongaku dhe odha li dha adhika komukunkulo gwekango ndyoka. Kapu na ngoka ta fekelwa ombedhi moshinima shika.
Aantu yalwe oyendji otaya fekelwa okukala ya gwila nokusila momeya mehulilo shiwike lya zi ko monooli yoshilongo, moka mwa li mwa monika omuloka gu li pombanda kaaku nawe muule womasiku ga piti.
MOlyomakaya lwopomugoyi kongulohi, olutu lwa Magadalena Daniel (39) okwa li lwa adhika lwa kaama kombanda yomeya mombashu ye momukunda Omatwadiva moshitopolwa shaMusati.
Mesiku olyo tuu ndyoka, omudhimba gwa Sakeus Kashimbode (79) okwa li gwa adhika mondama yomeya lwopone yokomatango momukunda Onekwaya shokUuzilo. Nakusa otaku hokololwa kutya okwa li a monika lwahugunina mEtitano kongulohi. Onkene olukongo lwe olwa li lwa tamekwa nolutu lwe olwa li lwi itsuwika momeya.
Moshiningwanima shilwe sheso lyomeya, olutu lwa Apiniel Gustav (2) okwa li lwa adhika momuthima mOsoondaha kongulohi momukunda Okanwa. Kapu na ngoka ta pelwa ombedhi yeso lye. Omakonaakono gopolisi oge li metifa.
Opolisi natango oyali ya lopota kutya omudhimba gwa Moshivasha Shambanga, ngoka e li omukiintu omugundjuka omvalele ya Angola, okwa li gwi itsuwika gwa kaama momeya gokanala mOsoondaha ethimbo lyongula momukunda Omangolowani moshitopolwa shaMusati. Okwa lopotwa kutya nakusa ngoka okwa li a monika lwa hugunina mOlyomakaya molukanda lwaKatamba mo-Angola lwopohamano komatango.
Opolisi otayi fekele kutya nakusa okwa li a manene oondjenda momeya mo-Angola nomudhimba gwe okwa li gwa kungululilwa moNamibia koshimoko shoonkondo dhomeya ngoka taga zi koshilongo shoka.
MOsoondaha, olutu natango okwa li lwa adhika mondama lwopontano komatango momukunda Ethiya momudhingoloko gwaMuntele. Nakusa okwa hololwa kutya oye Wilbard Shaanika (34).
Otaku hokololwa kutya nakusa okwa li a zi megumbo ethimbo lyongula ashike ina galuka we naashoka okwa li she etitha olukongo lwe.
Moshiningwanima sha yooloka, Nestory Jesaya (46) okwa li a mana oondjenda pehala lyoshiningwanima konima sho a li a nyengwa okupangela oshihauto omolwonthenu mopate, naashoka osha li she etitha opo oshihauto shi galangate. Oshiningwanima shoka okwa li sha ningilwa pokati kOngwediva nomukunda Omatando mEtitano lwopomulongo nambali guusiku.
Mo Henties Bay, otaku hokololwa kutya Josef Petrus (39) okwa li a hulitha konima sho oshihauto a li ta hingi sha li sha thenunuka ko kopate ndjoka ya li ya tuta nokwa li i idhenge mekuma lyongandjo yegumbo. Oshiningwanima shoka osha li sha ningwa mOlyomakaya lwopetata lyombali koongulasha mepandaanda lyedhina Pelican Street.
Petrus, ngoka oye awike a li mo moshihauto, okwa li u umbwa mo moshihauto nokwa li a hulithile pehala lyoshiningwanima.
Omvula ondhigu ndjoka ya li ya dhenge iitopolwa oyindji mondoolopa yaShikango moshitopolwa shaHangwena oya li ye eta eyelu ndyoka lya thigi oopate odhindji dha patwa.
Pomahala goositola opwa kala uupyakadhi kwaamboka ya hala okukalanda iinima yawo, molwaashoka omeya okwa li ga mboloka uupitilo wokuya momahala ngoka.
Oontompa ndhoka oomfupi odha li dha yi kohi yomeya, nonande omvula onkene tayu ulike tayi ka tsikila.
Mayola gondoolopa yaShikango, Eliaser Nghipangelwa okwa li a popi kutya itashi halutha okumona ondoolopa ndjoka yi li kohi yomeya molwaashoka oyi li mesilu.
“Osho owala hashi kala ngaaka kashi shi oshipe. Uuna kwa za omvula onene, olundji osho ha mu kala ngaaka. Inashi pumbwa okutulitha omutse kepepe. Kalunga okuli miilonga nota longo, onkene nayi loke. Onkalo yomeya ngoka kayi shi lela yi ngulutila ngaashi tashi monika,” osho a popi ngaaka. Nghipangelwa okwa li a londodha aakalimo yomOshikango opo ya kale ye li uupathi yo ya yande okutaaguluka omilonga niishana mbyoka yi na omeya taga tondoka.
Opolisi nayo oya londodha aahingi yiihauto opo ya yande okwe enda pomahala ngoka taga tondoka omeya, momilonga osho wo momadhiya ngoka ge na omeya ogendji, yo ya kale ya kotoka nokuyanda okuhingilila uuna kuna oshitosi.
Nonande iitopolwa oyindji moshilongo oya li ya mono omvula onene omasiku ga piti, onkene natango omvula onene ya tegelwa yi tsikile.
Omvula onene ndjoka ya loko moHangwena noya li ya thigi omagumbo ogendji noongeshefa dhi li kohi yomeya, oya li woo ya kwatele mo ombelewa yoshikandjohogololo shaShikango ndjoka nayo ya li ya thigwa kohi yomeya gomvula onene ndjoka. Kansela goshikandjohogololo shoka, Fillip Namundjebo okwa ti aakwashigwana oya li ya kanitha iimuna yawo osho wo iikwamawawa omolwefundja. Okwa li a gwedhapo natango kutya oosikola dhimwe odha li dha patwa pakathimbo notadhi ka patululwa ashike uuna omeya ga ti po hwepo.
“Ita tu vulu okuningila owina tu kanithe oomwenyo sho osho nee oosikola dhimwe dha patwa. Omakango ogu udha noonkondo naanona itaya vulu okuga taaguluka. Inatu hala okuningila owina,” Namundjebo a popi ngaaka.
Molwaashoka ombelewa ye oyi li kohi yomeya kansela naaniilonga ye oya li ya tokola opo ya longele iilonga yawo miihauto yawo mbyoka haya kala ya thikameka komukunkulo gomeya ngoka ga yelula ombelewa yawo osho wo momiti dhi li popepi.
“Ompumbwe yiikulya oyo oshinima oshinene ngashingeyi osho wo omahala gokukala gopakathimbo. Ashike mboka taya vulu okukwathela naya kwatathane nombelewa yandje,” osho a popi ngaaka.
Aakalimo mboka otaya tembudhilwa komutunda ngoka gu li mEhenye Ext 11.
Ondoolopa yaShakati yimwe yomoondoolopa moshitopolwa shaShana ndhoka dha yelulwa noonkondo. Onkalo yomeya mondoolopa ndjoka otayi tongononwa kutya oya yaga kegonga, unene tuu kwaamboka ye na omagumbo ge li kohi yomeya momalukanda goombashu, gamwe nokuli oga hanagulwa po thilu. Onkalo yomeya ngoka mondoolopa oya guma aakwashigwana oyendji, mwa kwatelwa aanona mboka itaa ya vulu we nokuya kosikola manga nokuli yamwe oya kanithila mo omaliko gawo, ngaashi omambo nayilwe omolwomeya gomvula.
Omupopiliko gwelelo lyondoolopa yaShakati, Katarina Kamari, okwa li a lombwele oThe Namibian mOmaandaha kutya omwaalu gwaantu oyendji mboka ya gumwa onkene natango tagwi indjipala molwaashoka aakalimo oyendji otaya mbombolokele koombelewa dhelelo lyondoolopa opo yi ishangithe ya vule okumona omakwatho.
