Ongudu yoIndependent Patriots for Change (IPC) oya ti Omutumba wOpashiwana kau fi oshoongalele shoSwapo, onhele yokuninga oikonga ile oshaala yoyoongalele yongudu.
Ongudu oya ti omutumba owOvanamibia nowa pumbwa okutwikila nokukala onhele yokupula epangelo noku li fininika li kalele po oinima.
Omunapaliamente woIPC Ferdinard Hengombe edi okwe di popya Etivali.
Eshi oshe ya konima ongudu yoIPC kwa li ya lambalala Ephraim Nekongo eshi a yelula omukandaudaneko wongudu mOmutumba wOpashiwana.
“Onda limbililwa kwaasho tashi monika sha fa inashi yela nawa okuninga eyooloka pokati kopaliamente nongudu tai pangele yoSwapo, unene ngaa ngee omaluvala ongudu nomikandaudaneko tadi etwa momutumba.
Oshinakuwanifa shetu okwaamena oushili, okuyambula po Efinamhango nokukwashilipaleka ekalelepo loinima manga inatu fimaneka ongudu,” osho a ti ngaho.
Okwa ti opu na oveta tai pula ovanapaliamente va kalele po Ovanamibia nokuwilikwa kEfinamhango, ouwa woshiwana naapo ve li mondjila ile va puka.
Okwa ti okukala wa tumbaleka ongudu yoye yopolitika inaku puka. Ashike nee, opaliamente inai kala ya kalela po ongudu yopolitika yasha.
“Efimbo loikonga yopolitika ei nalo otali kumwifa, unene ngaa eshi ovanapaliamente tava nyikaanyika omaliumbato omunashipundi,” osho a weda po ngaho.
Okwa londwela ovanyasha vaha ninge oilongifwa yopolitika, ta weda po kutya ovanyasha Ovanamibia nava tuwe omukumo va pule omapulo adjuu ndee tava pula ekalelepo loinima, ponhele yokukala tava popile oinima yopolitika.
Okwa ti IPC ita tilifwa komivalu, omaluvala eengudu ile oinyadwa yopolitika.
