Omupangi moshipangelo shaNandjokwe Festus Amwaalwa okwa pula Omhangu yaMangestrata mOndangwa i kufe mo omukwatelikomesho womakonakono moshipofa shaye shekengelelo londuba yeemiliona.
Okwa ti kutya ekufombinga tali twikile lomukonakoni Leon Amakali otali piyaaneke a mone epangulo lopauyuki.
Amwaalwa, oo e li umwe womovatamanekwa ve li o28 moshipofa shekengelelo leemiliona N$2.2 koSanlam, eindilo eli okwe li ninga Etitano manga ta ningi eindilo laye lobooloha.
Okwa lundila Amakali kutya i te liumbata nawa, ohe mu ningile omatilifo noku li ominge naye molwoikumungu yopaumwene, ta ti omukonakoni okwa li ta pula a ye momilele namumwainakadona opo a dule oku mu pefa obooloha.
“Ongudu ei tai ningi omakonakono aa oya puka, yoo itai dulu okuyandja oumbangi ponhele yepangelo,” Amwaalwa ta lombwele omhangu.
“Ondi wete kutya Mr Amakali oku kwetele nge nokwa ninga nge omutamanekwa wotete medina loinima yopaumwene ya etwa eshi aanywa kumumwamemekadona,” Amwaalwa ta ti.
Oinima ei tai popilwa Amakali inai konakonwa komhangu, nomukonakoni ina nyamukula ko komapopya aa.
“Mr Amakali okwa ningila nge omatilifo, ta ti ‘ota ningi onghalamwenyo yange idjuu’ yee ota dulu okulombwela omutamanekindjai a mone nge ondjo medipayo lomutamaneki Justine Shiweda,” Amwaalwa ta ti.
Omutamanekwa natango okwa lombwela omhangu kutya okwa li a fininikwa pefimbo ta yandje ehokololo laye, ta ti ovakonakoni ova kala nokwaanya omahokololo aye.
“Nghee omapulaapulo a tamekele, onda kala handi fininikwa di yandje omahokololo oikando i dulife puitano.
Oikando ihapu omahokololo ange okwa li a taulwa po nokwa li nda lombwelwa kutya itandi yandje ouyelele oo va pumbwa,” osho a ti ngaho.
Amwaalwa natango okwa natango okwa nyenyeta kombinga yovanhu vamwe ovo ta ti ova kwatelwa moshikumungu eshi shokoSanlam ashike fiyo okeluwa eli inava mangwa po.
Okwa popya Hella Mpinge, Hilma Mulokoshi naHendrina Shooya, ta ti inava mangwa po nande opu na ouyelele kutya ova kwatelwa mo moshikumungu omu.
Okwe likanyuna yo kutya ke shii omuunganeki woshinima eshi Abner Mateus.
Amwaalwa okwa lombwela omhangu kutya omaliumbato omukonakoni okwe mu kufa omukumo moshikumungu omu ndee ta pula omhangu i tye ko sha.
