Omutamanekindjai Martha Imalwa okwa indila ovadali novatekuli va lopote ounona vavo ovo va kwatelwa moiningwanima yoimbuluma, ta londwele kutya ombili neameno laNamibia ole likolelela meenghendabala dopamuhanga di li ominge noimbuluma.
Imalwa okwa ti ovadali vamwe ove shi shii nawa kutya ohava mono omauwa okudja moiningwanima yoimbuluma ya ningwa kounona vavo ashike ohava dopa okulopota ounona vavo koveta.
“Ovadali vamwe otava mono omauwa okudja moimbuluma. Omona woye okwa dipaya omunhu ile a vaka oinima yovanhu, ashike ove, ongomudali, oho tyapula ashike oinima oyo ya fa ngeno ya longwa komona woye,” osho a ti ngaho.
Oshinima eshi okwe shi popya mOshoondaxa pefimbo kwa li a talela po komukunda wanakufya omutamaneki Justine Shiweda.
Shiweda okwa li a yashwa nokuponokelwa kongudu yovafufi kOndangwa momafiku 17 Oktoba odula ya dja ko nokwa xulifa molweponokelo olo Olomakaya.
Shiweda vati okwa li a ponokelwa konima a nukila pomutenya kutya ita tambula ombubo a dule okuyandja obooloha komunambelewa wopolifi mukulu oo a ninga omulongi woimbuluma Abner Mateus.
Imalwa okwa ti eponokelo eli oshimbuluma sha longekidwa nokwa indila oshiwana shi longele kumwe novakwatelipo voveta.
“Ohatu longo noshinima sha longekidwa. Lopoteni ounona veni kopolifi ngee va kwatelwa moimbuluma.
Namibia ota kala ashike e hadi ombili ngee kapu na oimbuluma,” osho a ti ngaho.
Okwa weda po kutya ngee ovanhu itava lopota ovaningi voimbuluma otashi etele oshilongo omikundu da mana mo.
“Ngee itamu lopota, oshilongo otashi kufwa ko kovalongifi voingangamwifi.
Taleni kuMexico, ngee inatu kotoka, oshilongo shetu otashi kufwa ko kovaungaungi noingangamwifi,”
Imalwa osho a londwela ngaho.
Omutamanekindjai natango okwa twa ovapolifi omukumo novatamaneki opo va longele kumwe nokunghonopeka eenghendabala davo.
Okwa ti kutya oshiwana oshi na eudeko kutya okuwilika oimbuluma oku li komapepe ovanambelewa vakula.
“Ovanhu vamwe ova itavela kutya oshinakuwanifa shaJoseph Shikongo naImalwa,” osho a ti ngaho.
Imalwa natango okwa yandja ombedi komakonakono a nghundipala oo haa eta ovafeekelwa va efwe divadiva konima eshi va mangwa po.
“Omafimbo amwe omufeekelwa okwa mangwa po nena ndee mongula ova dja mo nale kobooloha.
Opolifi nai ninge omakonakono a wana po i kwashilipaleke kutya ovafeekelwa ova kalekwa modolongo,” osho a ti ngaho.
Okwa popya kutya oimbuluma ohai kumu keshe umwe, mwa kwatelwa ovo ve li mosystema youyuki.
“Ohatu nyenyeta omaumbo etu taa teywa. Keshe umwe okwa kumwa, eemangestrata novatamaneki,” Imalwa osho a ti ngaho. Eshi kwa li ta popi poshitufi patulula shoipambele yoveta shomudo 2026 komhangu ya shiya ko mOvenduka oshivike sha dja ko, presidente Netumbo Nandi-Ndaitwah okwa ti oshilongo nashi ungaunge noinima aishe oyo tai imbi osystema youyuki i longe nawa.
Presidente okwa ti eameno lovapanguli, eemangestrata, ovatamaneki novanambelewa voikwaveta otali limbililike unene.
“Hamunambelewa woveta a efwa a fiye po oilonga yaye molwoumbada nomatilifo,” Nandi-Ndaitwah osho a ti ngaho.
Okwa yeleka kutya opo omunhu e wete ina panda etokolo loveta, osystema youyuki oya yandja omikalo da yooloka dokutula mo omaindilo etalululo letoko la tya ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
