Omupedu presidente Lucia Witbooi, okwa ti elongelokumwe lopaliko pokati koilonga yaAfrica ola pumbiwa unene li patulule eyokomesho leliko menenedu.
Okwa indila eengeshefa nomapangelo opo a longelekumwe meyambulepo loikwafaabulika, omaduto oinima nokupindikafana muAfrica.
Eshi kwa li ta popi komutumba wopangeshefa waNamibia naKenya moNairobi Etitatu, Witbooi okwa ti oilongo yaAfrica oya kala unene nokuninga oipindi nounyuni aushe efimbo lile, shi dulife eshi hai pindikafana.
“Otwa kala hatu landifa oinima yetu ihapu inai wedwa ongushu omanga hatu lande oyo ya wedwa ongushu.
Otwa kala hatu ningi oipindi momangeshefelo e hadi ndoo, nande otu na etu taa dulu okukala e li xwepo menenedu letu.
Efimbo ola fika opo Africa a lundulule omukalo wopaliko,” osho a ti ngaho.
Witbooi okwa ti eundafanotwokumwe lokupindika oshali pokati koilonga yaAfrica ola yandja omhito ya kula yokulundululila Africa mexwata lokupindika, tashi kwatelwa komesho koikwafaabulika, omaduto oinima, okuweda oinima ongushu nokupindikafana pokati koilonga.
Okwa yeleka kutya omaudafano aeke itaa lundulula onghalo yeliko, ta ti kutya omapangelo noikondo yopaumwene nava longele kumwe, tave lipake moikondo oyo tai eta po sha, ndee tava tu omukumo eengeshefa dOvafrica di lihanene ounyuni.
Okwa ti kutya Kenya okwe litula pondodo ongomukwateli komesho womaduto oinima, oungoba wopashimaliwa, omitwalo neengeshefa dopaunamapya nounaimuna, omanga Namibia ta e yadi ombili yopapolitika, elelo lopamufika, omatuliloshikepa a nuka po neemhito moshikondo shoikwanghono, oikwamina, omatalelepo, ounamapya nounaimuna nokunduluka oinima.
“Oilongo yetu aishe kumwe, oi na eenghono odo tadi dulu okuyambidida eyopombada loikwafaabulika, okuweda oinima ongushu moshitopolwa neyambukepo leliko tali kalelele,” osho a ti ngaho.
Witbooi okwa weda po kutya elongelokumwe lopaliko nali yelekwe yoo koilonga oyo ya totwa, oikwafaabulika oyo ya yambulwa po, eewino da yandjwa neemhito da yandjwa kovanyasha, ovakainhu novanangeshefa vopetameko.
