OMUNANGESHEFA a tseyika nawa gwopOkakwa mOmbalantu moshitopolwa shaMusati tate Johannes Aluvilu Sheehama a hulithila moshipangelo shepangelo shaShakati ongulonene yohela mEtiyali lyeti 19 Novomba 2013 konima yuuwehame wokathimbo nomepipi lyomimvo omilongo heyali nandatu (73).
Tatekulu John Sheehama, ngoka gumwe gomaamwayinamati yomunangeshefa a tseyika nawa kwali mOmbalantu nosho tuu nakusa tate David Sheehama,okwa kala wo omunafaalama nomunapolitika.
Egumbo lye nongeshefa ye ndjoka onene koonkwawo, oya kala pOkakwa mOmbalantu moshitopolwa shaMusati. Oyendji otaya lili nakusa John Sheehama a li omulumentu omunambili, omutiliKalunga, omunegumbo lela, omutekuli, omugongeli, omugandjimayele, omupukululi, omusimaneki nomukwatheli gwaayehe. Nakusa Sheehama okwa kala gumwe gwomaawiliki yewawa lyaakokele yoSwapo mOmusati nokwa kala wo oshilyo shompangu yokupangula aazaazaayi mboka haya adhika moshitopolwa shaMusati yaa na oombapila dhokukala mo. Okwa kala wo omuwiliki miinima yi ili noyi ili melelo lyOmbalantu, unene tuu momithigululwakalo nomwaambyoka yopashigwana nopapolitika nenge yopambepo megongalo lyawo lyaNakayale ELCIN. Okwa li lela omunyangadhali apehepehe nomukwatheli gwaayeheyehe. A li e shi okuya nokuza po.
Omumwayina Kolonela Peter Nehunga, ota ti kutya nakusa John Sheehama ine ehama ethimbo ele. Ta ti okuya mehuliloshiwike lya zi ko, okwa kala ta ti kutya oku uvite kee na we oonkondo molutu noye mu fala moshipangelo shepangelo shOutapi mOlyomakaya ga zi ko. Oshipangelo shOutapi oshe mu lundululile kwaashoka oshinene shepangelo shaShakati, hoka nee a ka hulithila ongulonene yohela mEtiyali lyeti 19 Novomba 2013.
Nakusa John Sheehama okwa thiga ko omuholike gwe, aanona, aatekulu nuutekulu. Omalongekidho gefumviko oge li metifa noosa odhi li pegumbo lye pOkakwa mOmbalantu moshitopolwa shaMusati.
Oshifo shetu otashi gandja omahekeleko konakuthigwapo atuheni.
