Omunangeshefa a hwahwameke ehogololo lyaNandi-Ndaitwah moshituthi shoosa

Omunangeshefa gwomonooli yoshilongo Josua Haimbodi okwa popile etokolo lye lyokuhwahwameka aalilasa ya hogolole omuulikwahogololo gwongundu yoSwapo Netumbo Nandi-Ndaitwah momahogololo ngoka taga ka kala ko omumvo twa taalela.

Haimbodi, pefumviko lya ningwa momasiku 13 Auguste moshitopolwa shaMusati, okwa longitha ompito a pewa opo a hwahwameke oshigwana shi ka hogolole ongundu yoSwapo nomuulikwahogololo gwawo, nokwa popi kutya mboka kaaye shi uvitile nawa oomboka owala ye li koongundu dhoompilameno.

Shoka osha landula sho Haimbodi a nyanwa koyendji mboka ye wete kutya osha puka okuhwahwameka iikwapolitika nenge iikonga yopapolitika miituthi yoosa.

Omunangeshefa okwa popi kutya ke wete sha puka okuhwahwameka aantu piituthi mwa kwatelwa shoosa molwashoka ohayi eta aantu pamwe nompito ndjoka ohayi kala ombwanawa okugandja etumwalaka lye.

“Okwa li tatu lili omusimanekwa ishewe kapu na omuntu ta mweneke ndje opo ndi ninge iikonga yoSwapo piituthi mwa kwatelwa naambyoka yoosa,” osho a popi ngaaka.

Haimbodi, ngoka wo a tseyika nawa nedhina Emirates, okwa ningi ehiyo lyongundu yawo yi ka hogololwe, pethimbo lyoshituthi shefumviko lya mumwayinagona meme Lahya Haihambo (50), shoka sha ningilwa momudhingoloko gwaNandjaba moshitopolwa shaMusati.

Pauyelele wa zi ku gumwe gwomaalilasa mboka ya li kefumviko, Haimbodi okwa li a pewa ompito komuwiliki gwoshituthi opo a gandje etumwalaka lyomahekeleko peha lyaakwanezimo, ashike lwanima okwa longitha ompito ndjoka okuhwahwameka aantu ya hogolole omuulikwahogololo gwongundu yawo.

Oshiningwanima shoka, osha dhana onkandangala kiikundaneki yopankalathano komalungula, sho okavidio ka tameke okwiingaana, ta ka ulike oshiningwanima shoka.

Mokavidio hoka, Haimbodi okuwetike ta popi kembako popepi noshiketha, ta lombwele aakwashigwana ya shilipaleke kutya oya ninga ehogololo lyomondjila okuhogolola ongundu yoSwapo osho wo Nandi-Ndaitwah momahogololo gaayehe ngoka ge li ko omumvo tagu ya.

“Omumvo twa taalela otagu ka kala omumvo gwondjokonona moNamibia. Otatu ka hogolola omupresitente gwoSwapo gwotango omukiintu. Onda hala aagundjuka, mu pulakene ndje. Kuthiiko oongaku koompadhi mu ka hogolole ongundu yoSwapo.

OSwapo yaNamibia oyo ashike ongundu tayi vulu okuhumitha komeho nokukaleka po ombili moshilongo,” osho a popi ngaaka.

Pethimbo ta lombwele oshigwana etumwalaka ndyoka aalilasa yamwe oyu uvitike nkene taya ngungutula nokuyamukula kutya inaya hala.

Konima yompito yaHaimbodi, omuwiliki gwoshituthi okwa yi pembako nokupopya kutya oye li moshituthi shoosa, ndele kaye li moshikonga shopapolitika.

Shoka sha ningwa kuHaimbodi moosa, osha nyanwa kaakwashigwana oyendji unene tuu komalungula, molwashoka oye wete sha puka okulongitha ompito ya tya ngaaka miikwapolitika.

Ashike nando ongaaka, Haimbodi okwa lombwele onzonkundaneki ndjika oshiwike sha zi ko kutya ye ke na shoka a ninga sha puka.

“Mumwamemegona okwa li omunapolitika nokwa li ndi na okuhwahwameka opo ongundu yoSwapo osho wo omuulikwahogololo gwopaupresitente ya hogololwe, naashoka oshi li ongomuthigululwakalo hagu ningwa gwongundu yoSwapo.

Ishewe shoka itandi shi hulitha po. Ngame omuntu nda longwa nondi na uulongelwe wonkatu yoDiploma miikwapolitika.

Ongundu yoSwapo onkene yi na oonkondo notayi ka lela natango muule woomvula 33 dhi li komeho,” osho a popi ngaaka.

Omunawino nomundjandjukununi gwiikwapolitika Rui Tyitende okwa popi kutya ndhoka dha popiwa kuHaimbodi poosa otadhi ulike kutya okwa longitha omukalo gwokugandja etumwalaka kuNandi-Ndaitwah kutya uuna a sindana nokuninga omupresitente, ina dhimbwa Haimbodi molwashoka okwe mu yambidhidha miikonga.

Okwa gwedha po kutya aanangeshefa oye na ondunge yokuyambidhidha aanangeshefa uuna ye wete kutya otaya ka mona mo omauwanawa mekwatathano ndyoka uuna she ke enda nawa momahogololo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.