Omunailonga woNamPost novatamanekwa vakwao vavali ova taalela oshipofa shekengelelo kOshakati eshi vati va kufa ombinga moumbudi woshimaliwa shi fike peemiliona N$2.2 va longifa omikanda doumbudi.
Epangelo ola ti kutya omunailonga woNamPost Sackaria Moongo (43) okwa dana onghandangala mekengelelo loshimaliwa shi dulife peemiliona N$2.2 okudja kehangano loMomentum Metropolitan.
Eshi a vatela okupatulula ombaanga nOkamutwe kOshilongo koumbudi.
Moongo novatamanekwa pamwe naye Wilbard Antsino naDaniel Kashima paife otava pula obooloha sha landula eshi kwa li va tulwa konima yekumba muMei.
Ova taalela oshipofa shekengelelo, okunduluka omikanda paumbudi noumbudi.
Pefimbo leindilo lobooloha mOmhangu yaMangestrata mOshakati Etivali, omutamaneki wepangelo Yeukai Kangira okwa tamaneka Moongo kutya okwa pitika omangela oyo ya eta eemiliona N$2.2 dekwashilipaleko laAndalberd Shilongo (49) di vakwe po.
She likolelela kepangelo, oimaliwa okwa li ya kufwa kekwashilipaleko laShilongo koMomentum Metropolitan ndee tai tulwa kombaanga yaNamPost oyo ya patululwa kwa longifwa okamutwe koumbudi.
Okamutwe koumbudi oko ka longifwa vati okwa li ke na omauyelele aShilongo opaumwene ashike okwa li ke na oshipala shomutamanekwa Antsino. Ombaanga okwa li ya patululwa petameko lomudo ou.
Kangira okwa lombwela omhangu kutya Moongo okwa vatela okuninga eekopi dokamutwe koumbudi, onghee nee okwa kufa ombinga mokupatulula ombaanga.
“Ngeno haave wa li meni loNamPost, ombaanga ei yaNamPost ngeno inai patululwa,” Kangira ta ti.
Moongo okwa itavela kutya oye a ninga eekopi dokamutwe, ashike okwa ti ka li e shii ngee kake shi koshili.
Okwa ti kutya yee okwa landula omalombwelo omunailonga pamwe naye, Phillip Angula.
“Kakwa li ndi shii kutya okamutwe okalyelye. Inandi ka lesha noku ka lesha.
Onde ka pewa komunalingo pamwe naame Phillip Angula, oye kwa li e na oku ka tala,” Moongo ta lombwele omhangu.
Ashike nande ongaho, omutamaneki, okwa ti kutya Moongo okwa ningila eekopi dokamutwe aka owina opo a holeke oumbudi ou ndee ta ti kutya epangelo oli na omukandaano wa dja kuAngula tau ti Moongo okwa eta omunhu oo a patulula ombaanga kuye ndee ta ningi eekopi dokamutwe yee mwene.
Moongo edi okwe di anya, ta ti Angula oye e mu lombwela a ninge eekopi. Okwa ti vali manga kwa li ta i pokafudo kotee, Antsino oo kwa li e li pondje yombelewa namukwao umwe okwe ya kuye ta pula ekwafelo lokupatulula ombaanga.
“Onde va twala kuAngula, oo e va vatela va patulule ombaanga. Kakwa li noho oshikando shotete handi twala ovayakulwa kuAngula,” osho a ti ngaho.
Kangira okwa ti Moongo okwa futa Angula oshimaliwa shi fike poN$1 000 opo a patulule ombaanga ndee te mu udanekele vali oN$10 000.
Epangelo natango ola ti kutya, konima oimaliwa oyo ya vakwa ya tuminwa mombaanga yotete yaNamPost oyo kwa li i li kedina laShilongo, oN$480 000 okwa li ya tuminwa kombaanga onhivali yaNamPost oyo vati ya patululwa neyambidido laMoongo.
Ombaanga okwa li i li kedina laAmakali Tangeni ashike vati nayo okwa li i na efano laAntsino.
Kangira okwa lombwela omhangu kutya Moongo, Antsino nomutamanekwa pamwe navo Daniel Kashima aveshe okwa li ve na oufemba wokulongifa ombaanga ei.
Epangelo ola ti, eemiliona N$2 doimaliwa ei ya vakwa okwa li da longifwa po moule wokafimbo kaxupi.
Oshimaliwa ashike shi fike poN$200 000 sha shaala ko konima omutamanekindjai a pewa oufemba kOmhangu yOpombada a kwate ko oimaliwa ei ya shaala po.
Omikanda domhangu otadi ti kutya oimaliwa imwe okwa li ya longifwa okulanda eetuwa nhatu, imwe eshete loC200 litoka laKashima, olo la kwatwa ko kepangelo.
Ashike otuwa ei vati oi li kedina lehangano la kwatakanifwa nomu tamanekwa omutitatu.
Eindilo lobooloha otali ka udika momhangu momafiku 24 fiyo 25 Auguste.
