Oshilongo oshi na omumbwe yakula yovashingidila novayandji vomadeulo eedila, osho shi li tashi piyaaneke oshikondo shomatuko eedila nomatalelepo.
Eshi osha hololwa momukanda wa longekidwa kehangano loovene veedila novashingidila ledina AirCraft Owners and Pilot Association of Namibia (Aopa), olo tali pula ekufombinga lepangelo meendelelo, li xwepopeke onghalo.
“Eedila dongeshefa moshilongo paife ngaha itadi dulu omumbwe yoilonga, nosho yo eyokomesho lomonakwiiwa olo tali tengenekwa,” Aopa ta ti.
Paife moshilongo omu na ashike ovanhu ve li 202 ovo ve na omikanda dokushinga eedila dopangeshefa. She likolelela komapekapeko a ningwa koAopa, oshilongo osha pumbwa ovashingidila dopangeshefa va wedwa po ve li o-60 nosho yo ovayandji vomadeulo kombinga yeedila va wedwa po ve li 14.
Omumbwe oya eta oshilongo shi kale ashike shi na ovashingidila dopangeshefa vashona ovo va deulwa. Oshikondo sheedila osha fimana komatalelepo, Aopa ta ti.
Pakutala kefimano lomatalelepo keliko loshilongo, omumbwe yovashingidila nai kale omukundu wakula koshilongo, ehangano tali ti.
“Eedila ohadi ningi oinhano pokati keenhele da fimana, ngaashi omalukalwa neenhele doinamwenyo, eedoolopa nosho yo eenhele dopaiwana i xwepo,” olopota tai ti.
Ehangano otali indile opo ku pitikwe ovashingidila vokondje yoshilongo va longele moshilongo.
“Oministili yoikwameni nai tale kokuyandja omikanda kovashidila veedila dopangeshefa vokondje novayandji vomadeulo,” olopota osho ya pula ngaho.
